Junkshop nasunog sa Minglanilla

CEBU, Philippines — Milanat og tulo ka oras ang sunog nga nitumaw sa usa ka junkshop sa Upper Tulay, lungsod sa Minglanilla kagahapon sa buntag.

Ang junk shop gipanag-iya ni Jennifer Aviles nga nagpuyo sa maong dapit.

Si FO2 Derick Cordova, imbistigador sa Minglanilla Fire Station nagkanayon nga adunay nagdaob gawas sa junkshop hangtud ang kayo niabot sa koral nga ginama sa sin.

Ilang nadawat ang alarma mga alas 8:53 sa buntag hangtud nga sila nideklara og Task Force Alpha mga alas 9:53 sa buntag.

Diha nasab nisunod ang pagbuto sa acetyline ug ubang tangke nga naa sa sulod sa junkshop.

Matud pa ni Cordova nga wala ray mga tawo o trabahante nga nasamdan gawas lang sa ilang sakop sa kabomberohan nga nasamad ang kamot sa pakigbugno sa kayo.

Nagkanayon si Cordova nga nigamit sila og chemical nga gisagol sa tubig aron mapawong gyud nila ang kayo.

“Amo nalang gisalbar ang duha ka balay nga nagpatunga sa junkshop, ang tindahan sab gani naluwas man,” asoy pa ni Cordova. Wa na mokatap ang kayo ngadto sa mga panimay nga naa haduol sa nasunogan, mga alas 11:39 sa buntag, gideklara sa kabomberohan nga under control na ang sunog.

Wa pa masuta kun pila ang danyus nga gibilin sa maong sunog ug nagpadayon pa usab ang kabomberohan sa ilang imbestigasyon. /MEL (BANATNEWS)