Molecular laboratory sa PRO-7 magamit na sunod buwan—Ferro
CEBU, Philippines — Ang molecular laboratory sa Police Regional Office (PRO)-7 nga anaa diha sa Camp Sotero Cabahug sa Gorordo Avenue, Dakbayan sa Sugbo alang sa COVID-19 ang giingong 92 porsyento na kining kompleto.
Kagahapon sa buntag si Police Brigadier General Albert Ignatius Ferro, direktor sa PRO-7 ang nisusi sa maong pasilidad diin iyahang gipahibawo nga hapit na makompleto ang construction niini.
Matud ni Ferro nga sa sunod buwan mahimong magamit na ang pasilidad inig mahuman na unya ang pagbalhin sa mga ekipo ug makompleto na ang billeting area alang sa mga medical personnel.
Gibutyag ni Ferro nga gipaabot nalang nila ang accreditation sa Department of Health (DOH)-7 kinsa nipasalig usab ngadto sa PRO-7 nga motabang sa pagpadagan sa pasilidad.
“It’s very important because at least our PNP here in region seven can now have a fast testing and if our policemen that are on the streets, that are guarding our citizenry are COVID free rest assured they will be more efficient”, matud ni Ferro.
Ang molecular laboratory sa PRO-7 proyekto kini nga gipasiugdahan sa Camp Crame nga nagtingiuha sa pag-prioritize sa frontliners ug mga police personnel.
Andam usab sila nga motabang sa Siyudad sa Sugbo kon ugaling magkinahanglan og ayuda ilabi na sa pagpahigayon og swab testing.
Dugang ni Ferro nga nikabat ngadto sa P13 milyones ang budget nga ilang gitagana alang sa maong katuyoan diin apil na niini ang pagpalit sa mga gikinahanglan nga ekipo. /BDB (BANATNEWS)
- Latest
