Ubos sa Fernan Bridge butangan og mga polis

CEBU, Philippines — Gitinguha sa direktor sa Lapu-Lapu City Police Office ang pagdestino og mga polis sa ubos nga bahin sa Marcelo Fernan Bridge.

Kini nunot sa nakita sa video niadtong Domingo nga panagtapok sa mga tawo nga wala masubay ang minimum standard sa health protocols sama sa social distancing.

Si Police Colonel Clarito Baja niingon nga sa higayon nga masuta ang pagdagsa sa mga tawo himoon nila ang pagpatrolya sa tibuok dapit.

Si Baja niingon nga bisan kun nipaluag na sa quarantine status ang kagamhanan sa maong dakbayan apan iyang gipahimangnuan ang publiko nga motuman kanunay sa minimum required health standards sa paglikay sa pagkuyanap sa virus.

Bikers gihangyo

Samtang sa Dakbayan sa Talisay, gihangyo ang mga bikers nga ilang sundon ang mga health protocols bisan pa man sila magpasingot.

Daghang bikers ang manaka sa bukirang barangay apan namatikdan nga nawagtang na ang social distancing ilabi na nga mamahuway ug magtapok ang mga bikers.

Si Police Major Gerard Ace Pelare, hepe sa Talisay City Police Station, inubanan sa local government unit (LGU) ug Inter-Agency Task Force nipakanaug og lagda alang sa mga bikers aron maprotehian ug ang mga molupyo sa nahisgutang lugar.

Ang bikers kinahanglang magdala og quarantine pass o ID o unsa nga dokumento nga sila gitugutan nga makagawas sa ilang pinuy-anan.

Ang pakyas sa pagpakita niini ang mahimo nga dakpon sa mga awtoridad.

Si Kapitan Joselito Laurante sa Manipis niingon nga nalipay siya kay sila gisuroy sa pipila apan iya lang sab nga hangyo nga unta motuman sa health protocols kay sila naningkamot nga ang ilang mga molupyo dili matakdan sa virus.

Gawas pa niana, iya sab hangyo nga unta dili magbilin og hugaw sa ilang lugar. Gabriel C. Bonjoc/GMR (BANATNEWS)