‘Flattened curve’ nakab-ot na?

CEBU, Philippines — Nangangkon si IATF Deputy chief implementer retired Major General Melquiades Feliciano nga na flattened na sa Cebu City ang ‘curve’ sa pagsaka sa mga kaso sa Covid-19 kun ang basehan mao ang gidaghanon sa mga bag-ong mga natakboyan ug mga nangaayo.

Si Melquiades namahayag niini sa dihang gipangutana kini ni Assistant Secretary Jonji Gonzales sa ilang regular nga programa sa Mugstoria Ta pinaagi sa Facebook Page sa Office of the Presidential Assistant for the Visayas (OPAV).

“Ang mga statistics ngayon shows especially the number of cases, shows that the curve has been flattened,” matud pang Melquiades.

“On the past seven days, we have an average of 20(new cases) per day.There are days that are less than 10 and some more than 20. Mortalities for the past week, it’s only less than 1, to 4 deaths per day,” dugang pa niya.

Base sa natala sa DOH-7 niadtong Agosto 19 ang Cebu City nakatala lang og walo ka dugang nga kaso, mao kini ang kinagamyan sud sa nakalabay nga 100 ka adlaw.

Nikubos ang kaso

Si Konsehal Joel Garganera, ang City’s Emergency Operations Center’s Deputy chief implementer midason sa pamahayag ni Melquiades, gikan sa gatosan nakatala na ang siyudad og ubos nga gidaghanon sa mga kaso.

“Before there was a day with 300 positives in one day, right now, we are down to two digits.In fact the other day, we only got seven(August 7),” matud ni Garganera.

Kataposang nakatala ang siyudad og kapin sa usa ka gatos sa usa lang ka adlaw niadtong Hulyo 24 (111 ka kaso), gikan niadto nagsige na kini og kagamay.

Samtang ang mga nangaayo matud pang Garganera sobra na 80 % sa kinatibuk-ang nataptan, samtang ang nangamatay karon buwana siyam lang. Mas gamay kini itandi sa nakalabayng bulan sa Hunyo nga miabot og 359 ang nakalas.

“There are more available hospitals and isolation centers and beds for Covid right now as compared in the past two months. Medyo libre na, ubay ubay na ang bakante and corresponding equipment medyo nakaginhawa pud ang atong hospital pud karon,” dugang pa ni Garganera.

Kapasidad

Sayo ning semanaha, ang DOH-7 miingon nga  30 porsiyento lang sa health care capacity ang nagamit ug ang case doubling time karon niabot na og 90 porsiyento, Samtang ang positivity rate nikubos sab gikan sa 30.2 % sa Hunyo 14 ngadto sa 9.7 porsiyento sa Hulyo 15  hangtud 4.1 porsiyento sa Agusto 15.

Matud ni Feliciano epekto kini sa naestablisar na nga sistema, paningkamot sa tanan, kooperasyon sa mga barangay ug bisan mga magpapatigayon.

Ang lapad ug agresibong contact tracing, testing, extraction, isolation sa mga gidudahang probable ug positive COVID patients sa labing daling panahon nakatabang og dako.

Nakatabang sab kining granular lockdowns sa balay, karsada, o sitio o bisan mga establisamento.  Ang dakong hagit nalang karon kun unsaon kini pagmentinar o mapahunong na ang pagtakod-takod ilabi na nga namalik na ang mga patigayon sa ilang operasyon.

Hugot sab karong gibantayan sa siyudad ang mamauli nga locally stranded individuals ilabi na kadtong gikan sa National Capital Region(NCR).

Central Visayas

Base sa natala sa DOH-7 sa Agosto 19 ang rehiyon adunay 69 ka bag-ong kaso. Tungod niini 3, 052 na ang active cases sa rehiyon.

Ang walo niini gikan sa Cebu City, 10 sa Mandaue, 18 ang sa Lapu-Lapu City, 21 sa Probinsya sa Sugbo, tulo ang sa Talisay, lima sa Minglanilla ug usa sa Consolacion.

Niabot na sa 18,055 ang cumulative cases sa Covid19 lukop rehiyon diin 13, 950 niini ang naka-recover human nadugangan nianang adlawa og 495. Samtang ang namatay anaa 1, 053 sumala sa DOH-7. Le Phyllis F. Antojado/IBM (BANATNEWS)