Ermita gipaesplikar tungod sa tigbakay

CEBU, Philippines — Gipaesplikar sud sa 48-oras pinaagi sa Show Cause Order sa Department of Interior and Local Government Central Visayas si Ermita Barangay Captain Mark Miral bahin sa nahitabong tigbakay diha sa iyang barangay niadtong nilabay nga semana.

Nakita sa buhatan sa DILG-7 bisan sa gipatuman nga hugot ang quarantine protocols ubos sa general community quarantine aduna gihapoy daghang mga tawo nga magpundok sa tigbakayan.

Matud pa ang uban wala gyud magsul-ob og facemask.

Si Miral sa iyang bahin nitug-an nga karong adlawa niya tubagon ang gimando sa DILG.

Dugang pa ni Miral,  aduna silay mga dokumento ug picture nga nagpakita nga wala sila magpabaya sa ilang trabaho diha sa barangay sukad pa sa pagsugod sa pandemic.

Si Miral miingon nga gironda nila ang maong tigbakay kauban ang mga polis ug lima ka tawo ilang nadakpan ug napasakaan og kaso.

Nagpasalamat si Miral sa mga molupyo nga maoy nipahibalo kanila bahin sa tigbakay nga nahitabo diha sa baybayon sa ilang barangay. – Rowena D. Capistrano/IBM

96 kaso natala sa CV

Ang Central Visayas nakatala og 96 ka bag-ong kaso sa coronavirus disease (COVID-19) niadtong Agosto 18, 2020 sumala pa sa DOH-7.

Ang 21 niini, mga bag-ong kaso gikan sa Cebu City, 10 sa Mandaue,17 sa Lapu-Lapu,34 sa Cebu Province, walo sa Talisay, usa sa Minglanilla ug lima sa Bohol. Hinungdan nga anaa na sa 3, 481 ang active cases kon diin 962 ang naadmit ug 2, 519 ang naa sa isolation.

Anaa usab sa 13, 455 na ang nangaayo human nadugangan og 259 sumala sa DOH-7.

Anaa usab sa 1,051 ang namatay gikan sa 17, 987 nga cumulative total nga kaso sa Covid-19 sa Central Visayas.

Ang walo nga bag-ong kaso sa Talisay City, nakaguba sa pipila ka adlaw na nga walay natala sa maong dakbayan ning semanaha.

Niadtong Agosto 17, way natala bisan usa sa siyudad ug 28 ang nangaayo na. Niabot na sa 85 porsiyento ang recovery rate sa COVID-19 patients sa siyudad.

Matud pa ni Gullas nga dili nila mapasalig nga padayon ang pag-ubos sa kaso sa virus apan ang iya lang dili gyud mokompiyansa ang mga Talisaynon. Gabriel Bonjoc/IBM (BANATNEWS)