Brgy Kagawad nga wanted gidakop
CEBU, Philippines — Usa ka opisyal sa barangay nga giingong ika-unom sa lista sa Most Wanted Person sa Lalawigan sa Sugbo ang gidakop sa Cebu Province Intelligence Unit sa Sityo Sandayong, Brgy Sunog sa Lungsod sa Balamban niadtong Martes sa hapon.
Ang akusado giila nga si Teofilo Bariquaro, 48, usa ka mag-uuma ug usa ka kagawad sa maong barangay.
Ang konsehal gidakop pinasikad sa standing warrant of arrest tungod sa paglapas sa Section 11 ilawom sa Article II sa R.A.9165 nga giisyu ni Judge Villarin sa Regional Trial Court, 7th Judicial Region, Branch 29 sa Toledo City kung diin wala’y piyansa nga girekomenda kaniadtong 2006.
Si Police Lieutenant Colonel Randy Korret, hepe sa Cebu Police Provincial Intelligence Unit nagkanayon nga si Bariquaro nalambigit sa kaso niadtong 2005 kalabot sa nasakmit nga 2, 958.26 gramong marijuana sa Barangay Magsaysay, sa maong lungsod. Matud pa nakaipsot sa kapolisan ang kagawad.
Giingon nga nahimong barangay tanod sa Barangay Sunog ang suspek niadtong tuig 2007, ug mikandidato pagkakonsehal niadtong tuig 2018 ug kini nakadaog. /IBM (BANATNEWS)
- Latest
