Nagpa cash-out sa ilang SAP gipangdakop

CEBU, Philippines — Mokabat ngadto sa 30 ka mga tawo nga nag-claim sa ilang Special Amortization Program (SAP) gikan sa Department of Social Welfare and Development (DSWD) ang gipangdakop sa Cebu City Police Office (CCPO) kagahapong adlawa.

Ang maong mga dinakpan giingong naglinya sa remittance centers aron pag-cash out sa ilang nadawat nga SAP human nakadawat og text gikan sa DSWD na makuha na ilang kwarta pinaagi sa money transfer.

Matud ni Waterfront Police Station Chief Police Captain Miles Damoslog nga dunay nakatug-an kanila nga dunay mga nagdasok ang tawo sa gawas sa usa ka money remittance center kagahapon maong ilaha kining giadto ug gisusi ang tagsatagsa nila ka mga quarantine pass.

Didto na nasayran nga adunay pipila nga nag cash out sa ilang ayuda kansang QPass dili schedule para sila makagawas subay sa gipatumang regulasyon sa siyudad aron malimitahan ang gidaghanon sa mga tawong naa sa kadalanan.

Gipasidan-an sila nga sugod karong adlawa, ipatuman na ang bag-ong ordinansa nga pamultahon og P1,500 ug posibleng mapriso sulod sa 30 ka adlaw ang mga malapason.

Ang Carbon Police Station nakadakop sab og 15 ka tawo diha sa Carbon Market ug sa dan Colon tungod gihapon sa pagkuha sa SAP wala mosunod sa schedule sa ilang quarantine pass nga sila makagawas.

Si CCPO Director Police Colonel Josefino Ligan  mimando sa mga station commanders nga magpatrolya sa ilang tagsa-tagsa nga hurisdiksyon.  /IBM (BANATNEWS)