Lider sa sindikato, sakop napatay

CEBU , Philippines — Patay ang gibansagang lider sa drug syndicate hasta ang iyang kauban human sa engkwentro tali sa mga operatiba diha sa Minglanilla Homes sa Barangay Tungkil sa Lungsod sa Minglanilla kagahapon sa kaadlawon.

Ang napatay mao si Basillo “Nilo” Quirante, 68, kanhi sakop sa kapolisan ug naila nga nga top 1 most wanted sa Rehiyon-7, samtang ang ikaduha nga napatay nga iyang kauban mao si Faustino Torres, 30.

Sumala pa sa kapolisan, si Quirante nalambigit sa nagkalain-laing krimen gikan sa pagpanulis, gun-for-hire ug pagpayuhot og ilegal nga drugas. Si Quirante apil sa mga gipanganlan ni Pres. Duterte nga drug personalities dinhi sa nasud.

Samtang si Torres giingong top 2 most wanted sa lungsod sa Dumanjug nga nag atubang sa kaso nga murder ug frustrated murder.

Ang mga operatiba sa Regional Inyelligence Division (RID), Provincial Intellegence Branch (PIB) Cebu Provincial Police Office (CPPO), Dumanjug ug Minglanilla Police Station maoy nihimo sa operasyon ug gisuwayan sa pagdakop si Quirante.

Apan inay nga motahan giingong gipamusil sa duha ang mga polis hinungdan sa nahitabong sinukliay sa bala hinungdan nga napatay ang duha.

Si Police Lt. Col. Nenedict Poblete, pangulo sa Regional Drug Enforcement Unit miingon nga duha ka buwan nilang gipanid-an ang mga suspek human nila nasayrang naa sila sa maong dapit nagpuyo.

Warrant of  arrests

Matud ni PRO7 Director Police Brigadier General Albert Ferro dunay lima ka mga warrant of arrest nga issue ni Regional Trial Court  Judge Leopolde Canete sa lungsod sa Barili batok nilang Quirante ug Torres tungod sa kaso sa illegal nga drugas, murder, ug robbery.

Giingon nga ang grupo ni Quirante ang nakaengkwentro sa mga sakop sa kapolisan didto sa Dakbayan sa Carcar nga niresulta sa kamatayon sa usa ka polis sa panahon sa kanhi direktor sa PRO7 Police Major General Debold Sinas.

Si Quirante nataktak sa serbisyo niadtong Abril 1995 ug matud pa human niini nisud kini sa negosyo sa illegal nga drugas, gun for hire ug uban pa nga kriminal nga binuhatan.

Ang grupo sab ni Quirante maoy gipasanginlang ang nag ambush niadtong 2015 kang Mayor Efren "Gungun" Gica panahon sa eleksyon.

Ang mga sakop sa Scene of the Crime Operatives (SOCO) nakarekober og gidudahang mga ilegal drugas, drug paraphernalia, armas nga KG-9 submachine pistol ug kalibre.45 nga armas diha sa crime scene.

Ang mga silingan sa duha nga nakahinabi sa mga tigbalita nahibulong sa kalit nga pagabot sa mga polis diha sa ilang dapit ug nahitabo ang maong pinusilay.

Matud pa nila, dili kaayo magtingog o managad kanila si Quirante samtang nagpuyo kini sa ilang dapit.

Sa pikas bahin, lima ka  gipasanginlang durugista ang nadakpan sa mga sakop sa kapulisan sa Dakbayan sa Talisay niadtong miaging adlaw.

Unang operasyon gihimo diha sa Sitio Mahayag, Barangay San Isidro ug nadakpan si Darwin Allego, 45, nga usa ka High Value Individual. Wa sab makalihok si Ricky Ibina, 45, kauban ni Allego sa dihang gipalibutan sa kapulisan. Nakuhaan sila og gidudahang shabu nga nitimbang og 5.50 gramos nga adunay balor nha P37,400.

Pipila ka minuto ang milabay, nadakpan sab ang grupo ni Cherry Nuñez, 45, Octave Bacalla, 59, ug si Lyndon Carliso, 26, ug nakuhaan  sila og 1.45 gramos nga gituohang shabu. .(BANAT NEWS)