PHPG nagpahigayon og information drive atol sa checkpoint

Cebu, Philippines — Nagpahigayon og random checkpoints ug information dissemination ang Provincial Highway Patrol Group (PHPG) diha sa Barangay Tungkop, Lungsod sa Minglanilla isip pahimangno sa pagbutang og barrier sa mga motorsiklo.

Pinangulohan ni Police Captain Michael Gingoyon, hepe sa PHPG uban ang Minglanilla Police Station ug Minglanilla Traffic Office nisita kini sa tanang motorsiklo ug public buses nga nangagi sa checkpoints.

Matud ni Gingoyon nga subay sa bag-o nga guidelines sa Department of Transportation Office ug Department of Interior and Local Government (DILG) kinahanglang adunay barrier ang motorsiklo sa likod sa drayber kong aduna kini angkas.

Ang tugotan lang usab nga mo angkas kadto lang direkta nga pamilya sa drayber sa motorsiklo.

Gibutyag ni Gingoyon nga atol sa maong operasyon adunay duha ka magtiayon ug usa ka managkapuyo ang gisita sa kapolisan diin gisusi ang dokumento ilang dokumento nga rekisitos nga ipakita sa checkpoint sama sa quarantine pass, household pass sa magtiayon o kapuyo ug adunay barrier nga gibutang sa luyo sa nagmaneho sa motorsiklo.

Gawas sa mga motorsiklo gisusi usab sa kapolisan ang mga public bus pasuta kong nasunod  ba ang one seat policy ug ang istriko nga pagsul-ob og facemask.

Gipanawagan usab ni Gingoyon ang publiko ilabi na ang mga motorista nga mosunod sa health protocol lakip niini ang pagbutang og barrier sa likod sa drayber sa motorsiklo, pagsul-ob og face shield ug dili kalimtan ang mga dokumento nga rekisitos sa ilang paggawas sa balay nga ipakita sa checkpoint aron dili malangan sa ilang mga lakaw. Sa maong checkpoint kapin sa 50 ka motorsiklo ug 10 ka bus ang napahunong sa kapolisan.

Gikataho nga usa ka motorsiklo ang na-impound tungod kay kuwang ang rekisitos niini ug walay rehistro ang motor. (BANAT NEWS)