79 pulis sa PRO-7 nangaayo na
CEBU, Philippines — Lain na usab nga 79 ka mga pulis ang naka-recover sa novel coronavirus sa Police Regional Office 7 ug nipasalig nga modonar sa ilang blood plasma alang sa Makatao Malasakit Blood Plasma Program.
Pormal nga mitambong sa pagsugat sa mga bag-o nga nangaayo si PRO-7 Director Police Brigadier General Albert Ferro sa 79 ka pulis gikan sa Recovery Center sa kapolisan.
Matud ni Ferro nga sa pagkakaron aduna nalang 108 ka pulis sa PRO-7 ang nagpaalim sa Central Visayas.
Gilauman sab nga maka-recover na sunod semana ang tanang polis sa rehiyon nga nataptan niini. Sa 528 nga nagpositibo, 420 niini ang naka-recover na ug nakabalik na sa ilang trabaho.
“We are just waiting kanang mga trainees ba we are just waiting sa ilahang result they are around 80 so pag nahuman nato siguro mga 90 percent na ang atung recovery rate and will just take care of the remaining and hopefully will be able to finaly have a very small number of policeman being infected,”matud ni Ferro.
Karong sunod semana molusad si Ferro og dungan nga pagkuha sa ilang blood plasma nga idonar ngadto sa Department of Health alang sa mga pasyente sa Covid-19 nga anaa pa sa tambalanan.
Gipahibalo sa hepe sa Mandaue City Police Office nga 22 sa 30 nila ka mga polis ang nangaayo na.
Matud pa ni Police Colonel Jonathan Abella, director sa MCPO nga sa walo nga wala pa naayo, lima na niini ang gi home quarantine samtang tulo ang naa sa quarantine facility sa Mandaue City Central School. – Romeo T. Limpangog/IBM (BANATNEWS)
- Latest
