52 ka sakop sa Akrho gidakop atol sa anibersaryo

CEBU, Philippines — Gidakop ang 52 ka sakop sa Alpha Kappa Rho fraternity niadtong Sabado sa gabii tungod sa paglapas sa mga protocol sa social distancing ug pagpahigayon og mass gathering.

Hinoon nakagawas ra dayon gikan sa detention facility human sila nakabayad  og tag P500 nga multa. Si Police Colonel Roderick Mariano, direktor sa Cebu Police Provincial Office (CPPO), nagmando og imbestigasyon sa insidente.

Ang mga sakop sa maong fraternity nagsaulog sa ilang anibersaryo sa Sitio Pitogo 1, Barangay Tubod, Lungsod sa Minglanilla niadtong Sabado sa alas 7 sa gabii.

Tungod niini gipahinumduman ni Mariano ang publiko nga ang pagdili sa pagpahigayon sa bisan unsang panagtigum ang nagpadayon pa ubos sa modified general community quarantine.

“Bawal talaga yan. Kasi sa nakikita natin, sobrang dami nila at saka pangalawa dun, may report sa kanila, parang nag-iingay, it was reported kay nagresponde tayo,” matud ni Mariano.

“Lagi nating sinasabi sa kanila na iwasan muna natin ang pag- violate ng quarantine (protocols) dahil under pa rin tayo ng quarantine guidelines kasi,” dugang niya.

Sa pasiunang mga taho nga uban sa nasikop sa mga sakop sa frat ang duha ka polis.

Matud ni Mariano nga ila kining susihon ilabi na nga sa inisyal nilang report walay nalakip nga mga polis sa nasikop.

Ang mga dinakpan gidala sa estasyon sa kapolisan alang sa booking.  Gani, gibuhian sila sa wala pa ang tungang gabii human ang matag usa nagkabayad sa tag P500 nga multa.

Ang selebrasyon sa Akrho subay sa ika-47 nga anibersaryo sa pagtukod sa fraternity sa tibuok nasud niadtong Sabado. /GMR (BANATNEWS)