Programa sa kapolisan naghatag ug tabang sa mga kabus

CEBU, Philippines — Gilusad sa Police Regional Office 7 ang Kapwa Ko Sagot ko sa Dakbayan sa Carcar subay sa ika 119th PNP Police Service Anniversary.

Ang maong kalihukan gipanguluhan ni PRO7 Director Police Brigadier General Albert Ferro uban sa Team Amigo Cops ug Carcar City Police Station.

Matud ni Ferro nga subay sa anibersaryo naghatag sila og hinabang ngadto sa mga 100 kapamilya nga nahatagan og mga groceries, tulo usab ka pamilya ang nahatagan og dugang nga grasya nga tulo ka kanding ug 5 ka pamilya nahatagan og buhing manok.

Gawas sa maong tabang adunay usa ka person with disability (PWD) nga usa ka senior highschool nga tinun-an ang gihatagan og android phone ni Ferro alang sa pagpadayon sa iyang pag- iskwela ilabi na nga gipatuman karon sa Department of Education and modular ug online classes samtang wa pay bakuna alang sa  COVID19.

Dugang pa ni Ferro nga sa ginagmay nga grasya nga nadawat sa kapolisan buot sab nila kini nga i-share sa uban ilabi na ngadto sa mga kabus ug mga nawagtangan og trabaho tungod sa giatubang nga pandemya.

Gawas sa Kapwa ko Sagot ko Program isip Central Visayas wide campaign sa PNP, aduna usab adopt a family program kun diin ang maong programa mao ang pagtabang sa pagtukod og balay sa mga tawo nga walay kapuy-an. /MEL (BANATNEWS)