Duque, sakop sa IATF gustong pahulipan

CEBU, Philippines — Samtang gipatun-an pa ni Pres. Duterte ang panawagan sa mga medical professionals didto sa Metro Manila nga ibalik una sila sa ECQ, usa ka manifesto sa laing grupo sab sa mga doktor ang nanawagan sa pagpakanaog sa pwesto kang DOH Secretary Francisco Duque ug pailisan ang tanang mga sakop sa Inter-Agency Task Force nga walay kabangkaagan sa medisina o health care.

Supak sab sila sa pagpabalik sa ECQ sa mga lugar kun dili usbon ang kasamtangang estratehiyang gihimo sa gobiyerno karon

Matud nila “devoid of scientific sense and health purpose” kining gihulagway nilang “Duterte-style enhanced community quarantine (ECQ) or lockdown” nga gipatuman sa Inter-Agency Task Force on Emerging Infectious Diseases, matud pa sa report sa Philstar.Com.

Gawas nga dili base sa siyensiya, mapanglupigon kini sa mga tawo nga gipang-lockdown.

Ang manifesto gilagdaan nilang Doctors Gene Nisperos, Geneve Rivera-Reyes, Darby Santiago, Leonard Javier,  Soraya Escandor, ug Registered Nurse Sean Velchez.

“Doctors and healthcare workers must reclaim quarantine for what it should be: A public health measure aimed at saving lives by stopping the spread of disease. We must reject the distorted forms of ‘community quarantine’ being imposed on us, as these are devoid of scientific sense and health purpose, and serve only to oppress our people,” matud nila.

“If we are to implement a quarantine, it must be a medical quarantine, with healthcare workers in the lead and with clear health goals and outcomes. To truly benefit our overburdened healthcare workers, a new framework and new leadership direction than the ones we currently have are imperative,” dugang pa sa grupo.

Kahinumdoman nga gimandoan ni Presidente Duterte ang militar, kapolisan ug mga elite police units sa pagbantay sa mga quarantine points didto sa kaulohan ug bisan sa tibuok nasud agi og pagkontrolar sa mga tawo nga dili makagawas-gawas aron paglikay kanila nga matakboyan.

Matud sa grupo, ang pamaagi unta nga gibuhat nahasubay sa unom ka batakang haligi sa healthcare system sa Pilipinas.

Duque ipatangtang    

Nanawagan sila nga tangtangon si Health Secretary Francisco Duque III ug ang tanang gipangtudlo nga mga heneral ug mga “czars” nga maoy daghan karon diha sa IATF ug ilisan sila og mga miyembro nga dunay kabangkaagan sa medisina nga maoy mohiusa sa tanan ug sentralisadong liderato.

Nanawagan sab sila nga mag-recruit ang gobiyerno ug dugang mga doktor ug mga nurses ug padak-an ang ilang sweldo ug benepisyo ug proteksyon. Kinahanglang dunay pundong itagana para sa local ug national interventions ug way tago-tagoon. Siguraduhon ang pagpadayon sa pag-atiman sa mga pasyente gikan sa primary hangtud sa tertiary levels diha sa mga publiko ug pribadong mga pasilidad alang sa tanang pasyente bisan dili COVID-19.

Giawhag sab nila ang pagpangusog sa kapasidad sa testing, tracing, isolation ug pagtambal diha sa mga institusyon ug komunidad, paggamit sa tukma nga teknolohiya pagtudlo sa katawhan kun unsaon paglikay sa sakit ug palambuon ang COVID-19 data processing and management, pinaagi sa pagtug-an sa gigikanan ug paagi ug hunongon ang pagpolitika sa COVID-19 data pinaagi sa pagbukas niini para sa tanan.

“Taking these six steps will put us in a better footing to protect our health workers as they try to save more lives.

These also allow room for health workers to gather themselves, breathe, and be reinvigorated even as more long-term interventions are being put in place,” dugang pa sa manifesto.