25-anyos nga inahan nakombikto tungod sa online child trafficking

CEBU, Philippines — Gihukmang mabilanggo ang usa ka 25-anyos nga babaye nga inahan sa tulo ka mga bata nga taga Lapu-Lapu City tungod sa kasong attempting trafficking, possession of child sexual exploitation materials ug child abuse.

Ang maong babaye nga mi-plead sa maong mga kaso gihukmang mabilanggo og 17 ka tuig ug unom ka buwan ni Judge Christine Muga-Abad sa  Regional Trial Court Branch 70 sa Lapu-Lapu City niadtong Hulyo 29, 2020.

Ang kombiktado misulod sa usa ka plea agreement kang Judge Muga-Abad kansang sala mao usab ang gitudlong Family Court.

Ang desisyon gipaagi sa video conference ug gimandoan ni Judge Muga-Abad ang babaye pagbayad og P600 mil nga multa, P500 mil sa moral damages, ug P100 mil sa exemplary damages.

Ang maong babaye nadakpan diha sa Lapu-Lapu City niadtong Abril 6 ning tuiga sa mga sakop sa PNP Women and Children Protection Center – Visayas Field Unit (WCPC-VFU) samtang ang siyudad ubos pa sa lockdown.

Ang pagdakop kaniya pinasikad sa arrest warrant tungod sa gibuhat niini sa iyang menor de edad nga ig-agaw nga babaye nga gi-livestreaming niini bugti sa kwartang gibayad sa online child sex offender pinaagi sa online sexual exploitation of children (OSEC).

Ang tulo ka mga anak sa suspek nga tanan wala pay 7-anyos gikostudiya na sa Department of Social Welfare and Development (DSWD) 7.

“Seeking justice for victims of OSEC does not stop even with the ongoing pandemic.... May this conviction remind criminals engaging in this crime that the risk of getting caught and spending several years in prison is real and that it’s not worth taking,” tipik sa pamahayag ni Atty. Lucille Dejito, IJM Cebu Field Office Director.

Ang maong babaye nakalapas sa Republic Act 9208 as amended by R.A. 10364 (Expanded Anti-Trafficking in Persons Act), R.A. 7610 (Anti-Child Abuse Law), ug R.A. 9775 (Anti-Child Pornography Act) in relation to R.A. 10175 (Cybercrime Prevention Act).

Matud pa nahitabo ang krimen niadtong 2016 hangtud 2018 sa dihang nag-edad pa ang biktima og 11-anyos hangtud kini nag 13-anyos.

Naluwas ang bata niadtong Hulyo 31, 2019 human gipahibalo sa US Federal Bureau of Investigation (FBI) sa Philippine Internet Crimes Against Children Center (PICACC) ang pagabuso.

Usa ka Alan Dennis Wolff, nga usa ka U.S. based child sex offender maoy matud pa nagbayad sa babayeng kombiktado aron abusohon ang bata.

Si Wolff mi-plead guilty sa duha ka higayon nga sexual exploitation sa mga bata didto sa hukmaman sa Minneapolis, Minnesota niadtong Disyembre 2019.

Moabot na 256 ka tawo ang nadakpan ug 90 niini na ang nakombikto dinhi sa Pilipinas sugod niadtong 2011 tungod sa OSEC. (BANATNEWS)