139 police trainees positibo sa COVID-19

Cebu, Philippines — Mokabat sa 139 ka mga police trainees sa Police Regional Office-7 diha sa Regional Training Center-7 ang nag-positibo sa novel coronavirus disease sumala pa ni PRO7 Director Police Brigadier General Albert Ferro.

Si Ferro miingon nga silang tanan gipaubos na sa isolation sugod niadtong miaging semana, apan silang tanan asymptomatic maong padayon ang ilang training pinaagi sa virtual classroom instructions ug ang ilang physical exercise kada  adlaw.

Sa gihimong contact tracing nasuta matud ni Ferro nga posibleng ilang nakuha ang virus gikan sa mga tawo nga maoy tiglaba sa ilang mga sapot ug tigluto sa ilang pagkaon.

Kini tungod kay kanunay sila maoy mogawas aron mangompra sa merkado.

“Based on their contact tracing it is highly possible that ang ilang mga laundryman ‘yung ilang naga laba ug naga luto sa ilaha because they are frequently going to the markets, those are the possible source of infection,” matud pa ni Ferro.

Giklaro hinuon ni Ferro nga sa wala pa sila gipadala sa training center ang mga recruits gipaubos sila tanan sa rapid test apan nag negatibo sila sa virus.

Apan tungod sa mga report nga daghang police recruits sa Luzon ug sa National Capital Region Police Office nga nangatakdan sa maong sakit, gimando sab ang pagpahigayon og RT-PCR test sa tanang recruits dinhi sa rehiyon sa miaging semana.

Sa paggawas sa resulta, 139 kanila ang nagpositibo sa COVID- 19 apan walay mga sintomas nga nanggawas sama sa hilanat, ubo, panakit sa tutunlan ug uban pa.

Lakip sa nataptan sa virus ang ilang training instructor  kinsa nag isolate na usab sa iyang kaugalingon. Matud ni Ferro nga asymptomatic sab kini.

Nangaayo na

Mokabat ngadto sa 101 nga mga pulis ang bag-o nga naka recover nga natapnan sa novel coronavirus disease (COVID-19) sa Police Regional Office 7.

Basi sa talaan sa PRO7 niabot ngadto sa 511 ang nataptan ug 322 ang naka recover na gikan sa nagkalain-laing unit sa kapolisan samtang upat niini ang nangamatay.

Si Konsehal Joel Garganera ang Deputy Chief Implementer sa Inter-Agency Task Force-Emergency Operation Center sa Dakbayan sa Sugbo niawhag sa mga polis nga nakalingkawas sa sakit nga mag-amping na sa ilang panglawas.

Si Garganera maoy namulong atubangan  sa 101 ka mga police nga COVID-19 ug iyang gipaambit ang iyang kasinatian sa dihang nataptan sa maong sakit ang iyang kapikas nga nadala sa tambalanan.

Pipila ka adlaw ang nilabay hasta iyang upat ka staff nataptan sab niini, samtang ang amahan sa usa sa iyang staff ang namatay tungod niini lakip na ang iyang seatmate sa city council namatay usab sa maong sakit.

Ang iyang gipasabot mao si kanhi konsehal Antonio Cuenco.