Pito ka elected officials sa tigbakayan pangkasohan

CEBU, Philippines — Pasakaan og kaso ang pito ka elected officials nga nalambigit sa pagpahigayon sa tigbakay sa Sitio Tagasa, Barangay Bitoon sa maong lungsod sa Daanbantayan niadtong Sabado. Ang maong mga opisyal giingong wala maapil sa mga nangadakpan atoll sa pagronda sa mga Regional Intelligence Division (RID7), apan ang Daanbantayan Police Station maoy nakatumbok kun kinsa sila.

Matud ni PRO7 Director Police Brigadier General Albert Ferro nga sa pito, tulo niini barangay kapitan samtang ang upat mga konsehal sa managlahing lungsod sa amihanan bahin sa Probinsya sa Sugbo.

Ang Banat News dili una mohingalan sa mga opisyal hangtud di makuhaan og pamahayag o kun mapasaka na ang kaso. Apan sila taga Daanbantayan, Medillen, Tuburan ug Borbon.

Gimandoan na ni Ferro ang Daanbantayan Police Station nga pasakaan og kasong kriminal ang pito ug makig alayon sa Department of Interior and Local Government ang pito ka mga elected officials alang sa kasong administratiba.

Mag-atubang og kasong kalapasan sa Presidential Decree 1602 kun illegal gambling ug Republic Act 11332 kun Bayanihan Act ang mga opisyal. Napahibalo na sab si DILG Secretary Eduardo An~o bahin sa pito.

“We already send report to our regional director and Secretary An~o to that effect so that the IATF knows and the regional level of DILG was also properly inform,” matud pa ni Ferro.

Dili kini maoy unang higayon nga adunay nga elected opisyal nga nadakpan ang kapolisan nga kalabot sa illegal nga pasugal panahon sa Quarantine period. /IBM (BANATNEWS)