Food packs gipangapod-apod sa lockdown areas

CEBU, Philippines — Nanghatag og food packs niadtong Domingo ang kagamhanan sa Siyudad sa Sugbo sa mga tawo nga apektado sa granular lockdowns sa Barangay Labangon, Tisa, ug Quiot. Personal nga gidawat sa mga opisyal sa mga barangay ang mga food items.

Laing lugar nga gitugutan sa Inter-Agency Task Force nga ipatuman ang localized lockdown mao ang Sitio Eyha, Guadalupe; Balaga Drive paingon sa Sitio Cekalco sa Labangon; Tuada Compound sa Tisa; Sitio San Isidro ug Abellanosa Compound sa Quiot; ug C. Mina Extension sa Mabolo. Ang mga residente sa maong mga lugar gidid-an sa pagbiya sa ilang panimalay ug ang ilang quarantine passes gisuspenso.

Gipaneguro sa kagamhanan sa siyudad ang tabang sa tanang pamilya nga apektado.

Ang granular lockdowns ipatuman sulod sa tulo ngadto na sa 14 ka adlaw gikan sa pagpatuman niini sugod niadtong Sabado.

Ang kapolisan ang padayong nagsusi sa mga lugar nga gipaubos sa granular lockdowns.

Alegria lockdown

Samtang human gipaubos ni Alegria Mayor Verna Magallon sa granular lockdown ang Sitio Upper Alangasil, Barangay Madridejos ug Sitio Tapon, Barangay Santa Filomena, giapod-apod sab dayun ang food packs sa mga apektado nga kabalayan.

Ang maong mga food packs gilangkuban sa bugas ug mga de lata alang sa usa ka semana nga konsumo diin ang pag-apod-apod nagdepende sa gidaghanon sa miyembro sa pamilya nga apektado.

Ang lokal nga kagamhanan sa Alegria nangandam na daan og mga sinakong bugas ug de lata agi og pagpangandam sa lungsod sa pagpakigbatok sa  COVID-19.

Ang mga apektadong residente giawhag sa lokal nga kagamhanan nga kung aduna silay panginahanglang medikal mahimo silang motawag sa Municipal Disaster Risk Reduction and Management Office sa numero 0905-524-1418 ug 0928-743-1788. Ang mayor sa lungsod mapasalamaton sa kooperasyon sa katawhan ug niawhag nga magmabinantayon ug magmaampoon kanunay. —Sheriza Mae R. Uy, Rowena D. Capistrano/GMR (BANATNEWS)