Paggamit sa eskwelahan isip isolation center palugwayan

CEBU, Philippines — Subling giawhag sa mga mayor sa Probinsiya sa Sugbo ang Department of Education nga lugwayan ang pagpagamit sa mga eskwelahan isip isolation center. Ang pangulo sa League of Municipalities of the Philippines (LMP-Cebu) ug Liloan Mayor Christina Frasco ang nihangyo sa DepEd-7 samtang wala pa gitugot ang physical classes.

Ang mga lungsod nigamit sa mga eskwelahan isip quarantine facility apan kutob nalang karong kataposan sa buwan sa Hulyo.

Matud ni Frasco nga hangtud anaa pay positibo nga kaso sa kalungsuran, kinahanglan ang mga lawak aron himoong isolation centers.

Wala giklaro hangtud kanus-a gamiton ang mga eskwelahan apan matud ni Frasco hangtud nga aprobahan ni Presidente Rodrigo Duterte ang adlaw nga mamahimo na ipahigayon ang face-to-face classes.

“What we can do is naa tay gamiton exclusively as isolation centers, nya ang kadtong schools wala gigamit as isolation centers pwede didto maka-work ang teachers. Pwede sad ta mag-clustering,” dugang ni Frasco. —/GMR (BANATNEWS)