A call for action

CEBU, Philippines — Nagtuo gyud ko nga kinaiya na gyud sa mga Sugbuanon nga buotan, manggihatagon, maabi-abihon, ug kugihan.

Motuman ug motahod gyud sa balaod, dili masinupakon sa mga establisadong mga patakaran ug labaw sa tanan relihiyoso.

Ang coronavirus global pandemic nga nihamok karon sa kalibotan nikalas na og daghang kinabuhi sa pagsugod sayo ning tuiga, naghatag kini og kahadlok, kabalaka, ug kalisdanan sa tanan.

Kitang tanan nalisang para sa atong kaugalingon ug sa mga mahal nato sa kinabuhi.

Ang Cebu City usa karon sa mga epicenter sa hulga sa Covid-19. Gimandaran kita nga magpundo sa panimalay, samtang tim-os natong gipanalangin nga unta matapos na kini.

Apan makaguol lang nga bisan sa atong paningkamot padayon ang pagkuyanap sa virus.

Ang Cebu City mao karon  dunay labing daghang kaso sa maong virus dili lang sa tibuok probinsya kondili sa tibuok nasud.

Ang news reports nag-ingon nga 26 ka barangay ang ipaubos sa granular lockdown. Nahibulong nganong nahitabo kini.

Ang nasudnong kagamhanan kinahanglan pang mopadala og special forces ug mga opisyales gikan sa nasudnong mga ahensiya aron mag-monitor sa sitwasyon dinhi, personal nilang gipamadlong ang mga nagpabadlong nga mga bata, nagtutok sa tanang mga gihimo sa siyudad batok sa virus.

Wala kini ikahimuot sa mga Sugbuanon. Kamahayan kaayo tungod kay makauuwaw nga tawgon kita nga mga “gahi’g ulo” nga gituohan nakong dili tinuod.

Nagpabilin ang akong pagsalig sa atong mga lider sa siyudad, duna silay kapasidad nga mabuhat ang ilang trabaho. Nakahinumdom ko kang Mayor Edgardo Labella nga sa sayo pa pagsugod sa pandemiya way protocols, way guidelines kun unsaon kini pagpakgang.

Posibleng dunay pagkuwang sa pipila ka butang ug wala magkadimao ang ilang mga lihok; apan bisan ang mga adunahan ug gamhanang mga nasud mao sab ang gidangatan samtang nagkadaghan ang mga nangatakdan ug nangamatay sa kalibotan.

Gikaingon nga ang Cebu City karon ang nagkupot sa record nga kinadugayang gi-quarantine dili lang sa Pilipinas kondili sa tibuok kalibotan!

Daghang mga tawo ang nawad-an og trabaho ug gipanggutom—nagkinahanglan og tabang.

Karon, akong gipanawagan ang atong mga local nga mga opisyal, ang atong pinalanggang si Mayor Ed Labella,  kinsa kusganong nakigbisog aron maangkon ang kinatas-ang posisyon sa siyudad ug nahatagan og mandato ug pagsalig sa mga Sugbuanon ug oportunidad nga pamunoan ang siyudad.

Akong giawhag ang mayor nga di tagdon ang mga kritisismo ug pagsaway nga gibatok kaniya ug maningkamot nga mahatagan og direksyon ang pagtapos sa krisis nga giatubang sa siyudad.

Samtang nagpadayon ang kombate, ang mayor mao ang makapatibuok ug makapadasig sa pag-umol og mga husto ug paspas nga aksyon.

Ang aksyon sa mayor maoy magpahinumdom sa katawhan sa iyang pagkamaayong lider sama sa usa ka bulawan.

Mahimong dawaton sa  mayor ang mga tambag –  daghan kaayo kini , magamit kaayo ug basin makatabang gyud, apan siya isip mayor mao gyud ang angay nga modesisyon.

Siya maoy gihatagan og mandato ug gisaligan sa mga Sugbuanon.

Kinahanglan ang iyang prayoridad mao ang katawhan karon ug hangtud sa hangtud. Usa ako sa mga Sugboanon  nga nag-ampo para sa atong mayor nga hatagan siya og daghang kaalam ug kusog aron mahatag ang gipaabot gikan kaniya sa katawhan.

Ako, magpadayon sa pag-ampo kang Señor Santo Niño, our Protector; Our Lady of Guadalupe, Patroness of Cebu; and Servant of God, Bishop Teofilo Camomot, nga bendisyonan ang atong Mayor ug giyahan siya sa iyang mga desisyon ug pamahayag.

Nga ang mga tambag kaniya iyang masusi ug ikonsiderar, nga ang atong mayor makakaplag og epektibong solusyon sa sitwasyon karon.

Mayor Ed, mahimong taas ang imong pakigbisog, puno sa kalisdanan apan sa pagsawop sa adlaw, isip imong igsuong Visayanian, ako ikaw pahinumdoman nga ang “true-blooded Visayanians fight best when the odds are greatest.”

We will survive, we will overcome!