Bantay sa pasyente sa VSMMC gihashasan

CEBU, Philippines — Nagtagbo ang mga opisyal sa kagamhanan sa Dakbayan ug Lalawigan sa Sugbo ingon man kadagkuan sa Vicente Sotto Memorial Medical Center aron matabangan ang mga tigbantay sa pasyente nga anaa gipahimutang sa Fuente Osmeña Rotunda.

Kini nunot sa pagpatuman sa VSMMC sa “No Watchers Policy” aron malimitahan ang mga tawo sa sulod sa hospital, ma-obserbar ang social distancing ug malikayan ang posibleng pagtakod sa coronavirus disease.

Matud ni Konsehal Dave Tumulak nga nakab-ot sa tigum nga ang VSMMC maoy mohatag sa lokal nga kagamhanan sa siyudad ug lalawigan sa lista sa mga pasyente ug authorized watchers.

“Duna silay ihatag nga mga ID ang Vicente Sotto para pud kita diri sa Fuente temporary pa na diha sa Fuente gipangitaan pa na nato og laing location asa nato na sila ibutang but for the meantime nangita pa ta og mga locations mopatuman ta og No ID Policy nga mosulod sa Fuente oval for temporary shelter for relatives o mga watchers sa pasyente diha sa Vicente Sotto,” sigun ni Tumulak. Ang tambalanan nitugot lang sab og usa ka bantay matag pasyente.

Ang kagamhanan sa siyudad inabagan sa lalawigan magtinabangay sa paghatag og pagkaon ug uban pang gikinahanglan.

Nasayran nga 26 ra ang bantay gikan sa Siyudad sa Sugbo samtang 196 ang gikan sa probinsiya.

Ang kagamhanan sa siyudad andam mohatag og tabang pinaagi sa mga buses nga masakyan sa sobra sa usa ka bantay pauli sa probinsiya.

“Naay possibility mogamay nalang ni atong watchers nga magbantay diha, kadto lang gyud valid watchers,” dugang sa konsehal. /GMR (BANATNEWS)