COVID-19 advisory sa BOPK gipatangtang

CEBU, Philippines — Igo lang nagtuman sa mando. Kini maoy gitug-an sa pangulo sa Prevention Restoration Order Beautification Order (PROBE) Raquel Arce mahitungod sa isyu sa mga tarpaulins nga gibutang sa skywalks nga naa sa mga barangay nga sakop sa Bando Osmeña Pundok Kauswagan (BOPK).

Ang tarpaulins mga health advisory o pahinumdom labot sa angayan nga buhaton aron dili matakboyan sa novel coronavirus disease (COVID-19).

Matud ni Arce nga gisugo ra sila sa Office of the City Administrator nga tangtangon ang mga tarpaulins nga dunay suwat nga “Distansiya, Mask, Hunaw Tuman Aron tanan OK” kay wa kini permits gikan sa Cebu City Government ug dili tungod kay BOPK o unsa ang lugar nga gibutangan.

Giingong sa dili pa magbutang og tarpaulins sa mga skywalks kinahanglang lukatan kini og permit diha sa Office of the Building Officials(OBO) kay dunay required size ug gani kanang mga posters, banners, streamers sa uban dunay permit gikan sa siyudad ug dunay logo sa City Government.

“Ang ako lang is og naa man gali koy sayop nga nabuhat I just follow orders. Ug unsa inyohang tan-aw naa koy sayop sa akong nabuhat ang akoa ra gyud ang sayop ra gyud nako nga motuman ra gyud ko og suguon because I am a good soldier. Wala koy labot unsay rason, kuan ra gyud ni akoa trabaho lang walang personalan,” matud ni Arce.

Ang pagtangtang sa mga tarpaulins gikwestiyon sa mga barangay kapitan nga dunay ingon niini.

Ang Barangay Banilad nga adunay ingon niana nga tarpaulin wala gitangtang ni Kapitan Dennis Tabar. Matud niya Domingo sa gabii mihangyo siya sa PROBE nga dili lang tangtangon ang tarpaulin tungod kay wala man siya’y nakitang dautan niini.

Dugang sa Kapitan, wala siya kasabot nganong ipatangtang nga information drive man kini ug wala’y sayop sa gisuwat sa tarpaulin.

“Later on nakahibawo ko ang ilang gi-rason tungod lang kay wala’y permit gikan sa City Hall mao nay ilahang rason. But ako, sa akong bahin lang mohangyo lang ko kay gobiyerno ra baya sad mi, Barangay sad mi unya ang permit lang gyud ilang gikinahanglan pwede i-waive lang, tungod kay sa karon nga panahon nga atong gibutang pud wa may dautan pareha raman sad sa gipangampanya ni Mayor Labella, hugas, distansiya, mask mao ra gyud niya naa lay gibutang tuman aron tanan OK, unsa may dautan ana?” ni Tabar  pa.

Si Atty. Rey Gealon, tigpamaba ni Cebu City Mayor Edgardo Labella miklaro subay na sa City Ordinance 1656 1996 Revised Zoning Ordinance nagtumbok nga kinahanglan mo-isyu og streamers permit ang OBO ug wala kini sagol      politika.

“Ang gibuhat sa PROBE mao lang ang pagpatuman sa City Ordinance 1656 nga napanday kaniadto pang 1996. Kana gituyo aron matan-aw, masusi ang gidak-on dili ba makabalda sa nagmaneho sa mga sakyanan kay ang butangan ra ba ang mga highways, ang main thoroughfares.

Now, kasabot ta sa mga barangay nga nagbutang ini sa highway basin wala sila kahibawo mao na gitangtang, gikuha unya apply mo og permit kay wala may exempted aning tanan,” si Gealon pa.

Sa higayon nga makakuha og streamers permit ihatag kini og balik ug maladlad sa nag-unang kadalanan apan kinahanglan sab matod pa makig-alayon sa DPWH kay ilaha ning huridisyon ang national highways. /IBM (BANATNEWS)