Desinyo sa shrine ug museum nahuman na

CEBU, Philippines — Ang National  Quincentennial Committee  hingpit na gayod nga mibukas  sa gisugyot nga desinyo sa Lapulapu Memorial Shrine ug Museum niadtong  Sabado Hulyo 18,2020   alang na sa  pagsugod   sap ag-ugmad niini.

Gipasabot  sa   mga sakop  sa committee nga ang maong  bag-o nga desinyo pinaagi sa gihimo  nga poster maoy  nagtug-an sa flagship project kabahin sa  500th Quincentennial Celebration  sa nasud nga mahitabo karong 2021.

Si Lapu-Lapu City Mayor Junard ‘Ahong’ Chan mihangop sa maong kalamboan kay mahuman na unya ang kaugmaran sa museum.

“Usa kini sa makahatag og garbo natong mga Oponganon kay magsilbi kining bag-ong tourist destination sa tibuok Pilipinas nga pagabisitahon sa liboan ka mga langyaw o mga lokal nga gustong mobalik tanaw sa atong kasaysayan,” matud pa niya sa iyang pamahayag.

Sa nasayran nga gitinguha  ang  kagamhanan ang pagpatukod  og museum sa nasud nga mahimutang sa Barangay  Mactan sanglit mao man kini ang maghulagway sa makasaysayanong kaagi ni Datu Lapulapu nga giila nga labing unang bayani sa nasud  nga Pilipinhon.

Ang selebrasyon mao usab ang ika-500 nga kasumaran sa Kristiyanismo dinhi sa Pilipinas ug sa Asya Pasipiko diin unang gipaila ang relihiyon sa mayoriya karon sa mga Pilipino.

Samang mahinungdanong mga kalihokan sab ang himuon didto sa kaulohan agi og pagtimaan sa maong makasaysayanong adlaw sa Pilipinas. (BANATNEWS)