Mayor Sun Shimura balik na sa trabaho

CEBU, Philippines — Human sa halos usa ka bulan nga nawala sa trabaho human natakdan sa coronavirus disease, naka-recover na si Daan Bantayan Mayor Sun Shimura.

Ang Mayor, gisugat kini sa iyang mga kauban sa Munisipyo sa Daan Bantayan kagahapon  diin siya nihatag og mensahe.

Nagkanayon si Shimura ngadto sa mga empleyado nga magsilbi unta nga pagtolun-an ang iyang kaagi human siya natakdan sa covid-19. Matud sa mayor dili gyud angay nga mokompiyansa ilabi na ang mga frontliners nga lain-laing tawo ang mahimamat matag adlaw.

Tinuod ang ilang giingon nga social distancing at least one meter, tinuod gyud na nga always wear mask especially when facing someone, may sakit man ka o wala. Tinuod gyud diay ning face shield nga gihimo diay  kay mosulod man diay ni siya sa mata, matud ni Shimura.

Ang Mayor sa kataposan nagpasalamat  sa tanang mga nisuporta ug nag-ampo alang sa iyang recovery.

Si Mayor Shimura  nitambong  kagahapon sa joint meeting sa Municipal Peace and Order Council (MPOC) ug sa Municipal Anti-Drug Abuse Council (MADAC)  diin gihisgotan ang peace and order nga sitwasyon sa lungsod, update sa proposed budget alang sa anti-drug abuse program lakip na ang mga plano pa sa sunod nga tuig.

Niadtong Miyerkules Hulyo 15, 2020,  si Shimura una kining nipost sa iyang social media account sa iyang medical certificate nga nagpakita nga siya naka-recover na sa coronavirus disease COVID-19.

Kahinumduman niadtong bulan sa Hunyo si Shimura nianunsyo nga siya nagpositibo sa coronavirus disease. Siya ang ika-duhang mayor sa tibuok isla sa Sugbo nga natakdan sa maong sakit human ni Lapu-Lapu City Mayor Junard “Ahong” Chan. /MEL (BANATNEWS)