Polis nga gipasanginlang nangulata giparelibohan na
CEBU, Philippines — Giparelibohan na sa Cebu Provincial Police Office (CPPO) ang usa ka polis sa Minglanilla Police Station kinsa gipasanginlang nangulata og suspetsadong durugista.
Matud sa direktor sa CPPO Police Colonel Rhoderick Mariano nga iyaha nang gipadisarmahan ug girelibohan si Police Staff Sergeant Junarie Bacus Latorre samtang nagpadayon ang imbestigasyon.
Ang inahan ni Junrey Racho Maquilan, 40 nga si Merculisa Racho, 63-anyos, taga Lower Calajoan sa maong lungsod ang nireklamo kini tungod kay giingong namatay sa kulata ang iyang anak. Giingong si Junrey nakaangkon kini og mga bun-og sa iyang ulo ug lawas.
Si Merculisa buot untang mopa-blotter sa maong insidente diha sa police station apan giingong gibalibaran kini sa mga polis tungod kay aduna nay nahiunang blotter batok sa iyang anak diin giingong nisukol kini sa mga polis nga nisikop kaniya.
Nakuha sa mga polis gikan sa posisyon ni Junrey ang kalibre .22 magnum nga pusil apan gihimakak ni Merculisa nga adunay armas ang iyang anak.
Si Mariano niklaro nga lihitimo ang gihimong operasyon sa iyang mga sakop diin nagpahigayon una kini og surveillance batok kang Junrey una nipahigayon og pagpangronda.
Si Junrey kinsa usa ka drug personality giingong bag-o lang kining nakagawas gikan sa prisohan ubos sa plea bargaining. /BDB (BANATNEWS)
- Latest
