Kapitolyo nipadala og medical team sa Bogo

CEBU, Philippines — Ang kagamhanan sa Probinsiya sa Sugbo nipadala og medical team ngadto sa provincial hospital sa Dabkayan sa Bogo human ang mga medical staff sa maong tambalanan nga na-exposed sa nagpositibo sa covid-19 ang gipangkwarantina.

Si Dr. Christina Giango nagkanayon nga lima ka nurse ug lima ka nursing attendants ang ilang gipadala ngadto sa maong tambalan human nga ang chief of hospital sa CPH-Bogo nipahibalo kalabot sa sitwasyon sa tambalanan.

Matud ni Giango nga dili kini ang unang higayon nga nakapadala sila og team ngadto sa mga provincial ug district hospital sa probinsiya.

Ang probinsiya nakapadala na kini og medical team ngadto sa Bantayan District Hospital ug sa provincial hospital sa Dakbayan sa Danao diin adunay na-admit usab nga mga positibo sa covid-19.

Si Giango nagkanayon usab nga padayon ang paghatag sa Kapitolyo og Personal Protective Equipment (PPE) ngadto sa 12 ka provincial ug district hospital.

Samtang niabot na usab sa 26 ang total confirmed cases sa covid-19 sa mga empleyado sa Kapitolyo.

Dugang ni Giango nga sa maong covid-19 positive nga empleyado, 16 na kanila ang naka-recover, usa ang namatay ug siyam ang active cases.  /BDB (BANATNEWS)