Operasyon sa merkado ug mall sa Liloan i-regulate

CEBU, Philippines — Mayor Christina Frasco sa Lungsod sa Liloan nipagawas kini og executive order sa pag-regulate sa operasyon sa tanang pampubliko ug pribadong merkado lakip na ang supermarket sa lungsod samtang ubos pa sa quarantine period.

Ubos sa EO No. 2020-12 ni Frasco, ang tanang mga merkado dry ug wet market kinahanglang kutob lang sa alas 6:00 sa gabii ang oeprayson samtang ang mga supermarket manirado og alas 7:00 sa gabii gawas sa mga gitugotan nga mo-operate sulod sa 24 oras o kadtong mga frontliner, emergency ug health services, tambal o medical supplies.

Ang PanPhil B Frasco Market sa Barangay Jubay sirado kini matag Huwebes alang sa disinfection. Ang merkado sa Barangay Yati sirado usab kini sa adlaw nga Lunes ug ingon man ang merkado sa Capulay sa Barangay Tayud.

Samtang ang merkado sa Bajac, Brgy Poblacion sa adlaw nga Martes sirado kini  alang sa dinsfection.

Sa EO ni Frasco nalakip niini ang schedule sa mga mga residente sa mga barangay sa adlaw nga sila tugotang makaadto sa merkado.

Sa laing bahin, manghatag usab og 10,00 ka face mask ang lungsod nga iapod-apod ngadto sa 14 ka barangay base sa positive cases ug populasyon sa matag barangay.

Matud ni Frasco sa iyang facebook post nga donasyon kini gikan sa sister city niini ang Davao.

Gawas sa hinatag sa maong dakbayan dugang facemask ang ihatag sa lungsod ngadto sa mga residente. /BDB (BANATNEWS)