Sayop nga pag-isyu og certification sa CHO giimbestigar

CEBU, Philippines — Si Mayor Edgarcdo Labella sa Dakbayan sa Sugbo gidawat niini ang pagpangayo og pasaylo ni Cebu City Health Officer Dr. Daisy Villa kalabot sa kontrobersiya nga giatubang karon sa nahisgutang buhatan.

Ang maong insidente mahitungod kini 72-anyos nga lalaki nga residente sa Barangay Camputhaw nga gidala sa tambalanan human makasinati og sintomas sa covid-19 ug nakabsan kini sa kinabuhi niadtong Mayo 28, 2020.

Ang mga kabanay niini nipagawas sa ilang sentimento diha sa social media sa lapso nga nahimo sa city government dihang nakadawat sila og certificate nga ang maong lalaki nga namatay na naka-recover sa covid-19 ug nakagawas na sa tambalanan.

Nunot sa maong insidente si Villa nipagawas og pamahayag nga gi-post niini diha sa page sa Cebu City Health Department nga nangayo og pasaylo sa nahitabo tungod sa miscommunication ug clerical error sa habig sa Barangay Health Personnel sa maong barangay ingon man sa habig sa City Health Office staff nga na-assign alang sa issuance sa certification for clinically recovered individuals.

Matud ni Villa ang ilang buhatan nagpahigayon na og internal investigation sa maong insidente ilabi na sa processing sa certification gikan sa request, preparation, printing sa approval ug release sa maong certification sa City Health Office. /BDB (BANATNEWS)