‘Hard lockdown’ gipanghimakak sa PRO-7

CEBU, Philippines — Giklaro sa Police Regional Office 7 nga walay mahitabong tulo ka adlaw nga hard lockdown sa dili pa ipaubos ngadto sa modified enhanced community quarantine ang Dakbayan sa Sugbo.

Kini sukwahi sa nikatap nga taho nga adunay tulo ka adlaw nga hard lockdown nga giingong gisugyot sa COVID-19 Inter-Agency Task Force (IATF).

Matud ni PRO-7 Director Albert Ferro nga wala nahisguti sa tigum ang maong taho nga nakapaalarma sa publiko.

Subay niini gihangyo ni Ferro nga dili angayan tuohan dayon ang mga impormasyon nga ipakatap nga dili gikan sa awtoridad. Hinuon dunay gisugyot si Secretary Carlito Galvez, ang IATF chief implementer, nga labing maayo nga ipaubos sa hard lockdown kadtong mga barangay nga adunay taas ang kaso sa COVID-19 sulod sa tulo ka adlaw dungan sa pagpa-test sa mga posibleng carrier sa virus.

Human sa tulo ka adlaw i-isolate ang mga magpositibo ug luagan na dayon ang lockdown sa maong barangay apan wala pa kini maaprobahi.

Mismo si Ferro natingala kung diin gikan ang nanggawas nga impormasyon.

Samtang wala pay kasayuran si Ferro sa lakang sa pag-downgrade sa status sa Dakbayan sa Sugbo ngadto sa general community quarantine (GCQ).Apan iyang isugyot nga hinay-hinay lang una ngadto sa MECQ sanglit nagpadayon pa ang ilang gihimong contact tracing. /GMR (BANATNEWS)