Ferro: Contact tracing sama sa pag-imbestigar og high profile nga kaso

CEBU, Philippines — Susama sa pag-imbestigar sa mga high profile ang ipatuman nga contact tracing sa mga nataptan sa covid-19 sa Dakbayan sa Sugbo. Kini maoy gipasabot sa direktor sa Police Regional Office (PRO)-7 Police Brigadier General Albert Ferro human sa duha ka adlaw nga contact tracing seminar nga gipahigayon nila ni Baguio City Mayor Benjamin Magalong.

Gibutyag ni Ferro nga ang pag-track down sa posibleng courier sa covid-19 isusama na nila sa pag-imbestigar sa mga high profile nga mga kaso. “Our campaign against covid-19 should be intelligence-driven. We should know the real situation because if we will not be appraised of the real situation, we won’t be able to address the problem”, matud ni Ferro. Ang mga nisalmot sa maong contact tracers training gilangkuban sa Regional Intelligence Division, Cebu City Intelligence Branch ug uban pang law enforcement agencies. Gibutyag usab ni Ferro nga adunay pipila nga strategy nga gibuhat si Magalong didto sa Dakbayan sa Baguio diin ilaha kining buhaton dinhi sa Sugbo sa pagpatuman sa contact tracing ubos sa dali nga pamaagi aron ma-isolate dayon ang nataptan sa virus.

Lakip usab sa ilang sundon nga pamaagi sa contact tracing sa covid-19 ang pagkopya sa ilang kampaniya batok sa ilegal nga drugas ug ubang matang sa dagkong krimen diin aduna sila’y himuon nga drug mapping pinaagi sa pagsusi diin naggikan ang supply sa ilegal nga drugas ug ang interlink analysis.

Giangkon ni Ferro nga nagkinahanglan usab sila og tabang gikan sa publiko sama sa mga tinun-an nga mohimo og data encoding sa mga bag-ong nataptan sa virus.

Sa pagkakaron kompiyansa si Ferro nga magmalampuson ang Sugboanon sa pakigbatok sa covid-19 ilabi na kong magtinabangay ug mokooperar ang publiko. /BDB (BANATNEWS)