PRO-7 padayong modonar og blood plasma

CEBU, Philippines — Ang direktor sa Police Regional Office (PRO)-7 Police Brigadier General Albert Ferro nipasalig nga mopadayon sa ilang pagdonar og blood plasma ngadto sa mga pasyente nga natapdan og covid-19.

Kini human nga 91 ka polis na ang naka-recover gikan sa covid-19.

Gikataho nga adunay mga tambalanan sa Dakbayan sa Sugbo ang nanawagan nga magpadonar og blood plasma gikan sa mga covid-19 recoveries.

Gani adunay mga polis gikan sa labing una nga batch sa kapolisan sa Cebu City Police Office (CCPO) ang nangaayo na sa maong sakit ang nidonar sa ilang blood plasma ngadto sa mga sibilyan nga nanginahanglan ug delikado ang kahimtang sa pakigbatok sa covid-19.

Gibutyag ni Ferro nga niadtong buwan sa Hunyo nisugod sila pagdonar diin duha ka mga pasyente sa covid-19 kinsa kritikal ang mga kahimtang maoy nakadawat.

Ang maong pasyente nga na-admit sa pribadong tambalanan sa Dakbayan sa Sugbo ang naka-recover kini.

Bisan tuod nga wala pay lapad nga mga pagtuon nga nagkompirma sa ka epektibo sa blood plasma batok sa covid-19 gisuwayan gihapon kini sa mga tambalanan ubos sa pagtugot sa Department of Health (DOH)-7.

Sa laing bahin, si Ferro niawhag sa mga tinun-an ug mga Sugbuanon nga adunay mga laptop sa pagtabang pinaagi sa initiative nga butangan kini og e-system alang sa massive covid-19 contact tracing sa Dakbayan sa Sugbo.

Matud ni Ferro nga kinahanglan silang maka-recruit og daghang data gatherer ug encoder nga motabang sa ilang mga kalihukan

Si Ferro nipasalig sa kaluwasan sa mga volunteer samtang mohatag sa ilang serbisyo ngadto sa kagamhanan sa siyudad. Rowena D. Capistrano/BDB (BANATNEWS)