Munisipyo sa Catmon sirado ugma hangtud Biyernes
CEBU, Philippines — Gipahibalo ni Catmon Mayor Irish Gestopa ang duha ka adlaw nga pagsuspenso sa trabaho sa mga buhatan sa lokal nga kagamhanan tungod sa disinfection ug sanitation nga pagahimoon.
Gihimo ni Gestopa ang maong pahibawo nunot usab sa iyang giluwatan nga memorandum nga pagsuspenso sa operasyon sa lokal nga kagamhanan sa maong lungsod ugma hangtud Biyernes.
Ang disinfection ug sanitation nga pagahimoon subay usab kini sa rekomendasyon sa municipal health officer sa pagseguro sa mga kawani ug mga tawo nga mohimo og transaksiyon nga makalikay sa coronavirus disease 2019.
Gitataw ni Gestopa sa iyang memorandum nga mobalik ang normal nga operasyon sa lungsod sa Hulyo 13, adlaw nga Lunes.
Naglakip sa mga buhatan nga ipaubos sa disinfection mao ang Mayor’s Office, Municipal Disaster Risk Reduction and Management Office, Treasurer’s Office ug uban pa. /GMR (BANATNEWS)
- Latest
