Insentibo sa private health workers sa siyudad gitinguha
CEBU, Philippines — Tinguha karon sa kagamhanan sa Dakbayan sa Sugbo nga mohatag og insentibo nga tag P10,000 sa mga trabahante sa mga pribadong tambalanan sulod sa tulo ka buwan.
Kini human nakita ni Cebu City Mayor Edgardo Labella nga daghang nurses, doctors, medical technologists, interns, radiologists, respiratory technologists ug technicians gihangyo nga mo-augment sa mga pribadong tambalanan sa siyudad diin ang ilang sweldo katunga ra sa mga naa sa publikong tambalanan.
Ang mga private health workers nitabang sa Chong Hua Hospital, Cebu Doctors Hospital, Perpetual Succour Hospital, Velez Hospital, Adventist Miller Hospital ug Cebu Community Hospital.
Matud pa nga dunay 1,800 ka private health workers nga angayan tabangan sa siyudad aron sa pag-boost sa ilang morale.
Gipakigkitaan na ni Labella ang Local Finance Committee ug mohangyo sab siya sa konseho sa siyudad pinangulohan ni Bise Mayor Michael Rama ingon man sa chairman sa Committee on Budget and Finance sa pagtan-aw sa posibilidad sa paghatag og P10,000 matag buwan sa mga mosunod nga tulo ka buwan sa maong mga private medical workers.
“Ang atong supplemental budget no. 2 naa pa man toy sobra kay wala man nato mahurot og gasto, pwede adto kuhaon didto pero kung wala na seguro maybe another supplemental budget but I’m confident nga naa pay sobra ang atong supplemental budget no. 2 para mahatag nato aning mga private medical health workers nga nakig-atubang, nakigbugno niining atong COVID-19 virus,” matud ni Labella.
Samtang gipahibawo sab ni Labella nga moabot na sa 142 ka pasyente nga naa sa Cebu City Quarantine Center ang naka-rekober ug nakagawas na.
Asoy sab mayor nga base sa sugyot sa kaubanan niini, kadtong mga bag-ong kaso sa COVID-19 sa dakbayan nga asymptomatic dili na dad-on sa Barangay Isolation Center ug adto na sa New Normal Oasis for Adaptation and a Home (NOAH) Complex sa South Road Properties. /GMR (BANATNEWS)
- Latest
