Piyesta sa Sitio Rattan, Tanke gibantayan sa kapolisan

CEBU, Philippines — Mga polis ang nahimong bisita sa taga Sitio Rattan, Barangay Tanke, Dakbayan sa Talisay atol sa ilang kapistahan kagahapong adlawa.

Ang grupo ni Police Major Gerard Ace Pelare, hepe sa Talisay City Police Station, nisuroy sa kabaybayon ingon man sa mga panimaye sa dapit.

Matud ni Pelare nga gipahibawo lang daan ang katawhan nga likayan lang una ang pag-organisar nga makapatapok og tawo.

Ang Dakbayan sa Talisay nipahugot sa ilang pag-obserbar sa physical distancing, pagsul-ob og facemask ug uban pa.

Gipasidan-an ang mga molupyo nga dili mag-inom-inom og ilimnong makahubog, mag-prosesyon ug pagkaligo sa dagat.

Nasayran nga ang mga nagpasiugda og prosesyon sa Basak-San Nicolas, Dakbayan sa Sugbo ang gipasakaan og kaso.

Nahimong sumsuman sa tanan ang maong lugar gumikan sa nikatap nga hulagway sa social media. — Gabriel C. Bonjoc/GMR

52 ka polis na ang nakarekober sa COVID-19

Mokabat na sa 52 ka polis ang nakarekober sa Police Regional Office 7 kinsa natapnan sa coronavirus disease 2019.

Kini ang gipahibawo ni PRO-7 Director Albert Ferro human nga niabot na sa kapin 100 ka polis ang natala nga nataptan sa Central Visayas.

Dugang ni Ferro nga sulod sa pito ka adlaw ibalik na usab sila sa ilang matag police station aron motrabaho isip mga frontliners human gipaubos sa isolation sulod sa kapin 20 ka adlaw.

Kasamtangan nga ang mga sakop sa Special Action Force nga gi-augment sa Kampo Crame ang mo-roving sa mga barangay nga taas ang kaso sa COVID-19 sa Dakbayan sa Sugbo.

Tungod niini niawhag Ferro sa mga Sugboanon nga motuman sa kamanduan ug magpabilin lang sa ilang mga panimaye aron dili mokatap ang virus ug malibkas na ang lockdown.

Gipasalamatan sab ni Ferro ang mga SAF troopers nga daku og natabang sa pagmintinar sa kahusay ug kalinaw sa Dakbayan sa Sugbo atol sa pagpatuman sa enhanced community quarantine. /GMR (BANATNEWS)