Ordinansa sa quarantine sa siyudad sa sugbo aprobado na

CEBU, Philippines — Aprobado na sa konseho sa Dakbayan sa Sugbo ang ordinansa nga magsilot sa malapason sa lagda sa general ug enhanced community quarantine.

Ang ordinasa gipangamhanan nilang Konsehal David Tumulak, Raymond Alvin Garcia, ug Philip Zafra.

Naglakip sa mga kalapasan ang paggawas sa kadalanan ug mga publiko nga lugar nga walay G/ECQ pass, wala pagsul-ob og face mask ug speed limit sa mga sakyanan.

Nalatid sab ang pag-obserbar sa social distancing sa mga pangpublikong lugar ug mga establisemento ug negosyo ingon man sa publiko ug          pribado nga mga sakyanan.

Ang G/ECQ pass magamit lang sa pagpalit sa mga importanteng butang, tambal, ug mga suplay nga medikal ug uban pang mga palaliton; paggamit sa propesyon o trabaho alang sa mga trabahante sa exempt establishment ug uban pang mahinungdanong katuyoan.

Panahon sa G/ECQ, tanang pamatigayon sirado gawas sa mga buhatan sa gobiyerno nga naghatag sa mga batakang serbisyo; hospital, medikal nga klinika, ug laboratories; mga parmasya, suplay sa medikal ug drug stores; mga gasolinahan; funeral parlors; mga merkado, supermarket, groceries, bakeshops, ug mga convenience store; mga laundry shops; mga kompaniya sa telecommunication; mga delivery services; ang uban pang mga establisemento nga giisip nga exempted ubos sa executive order sa pagdeklarar og G/ECQ.

Ang social distancing labing minus usa ka metro ug tunga nga sa tanang higayon tumanon sa publiko nga mga lugar, mga pasilidad sa pamatigayon ug sa mga sakyanan.

Una nga kalapasan dunay multa nga dili moubos sa P3,000 o pagkabilanggo sa dili moubos sa 30 ka adlaw depende sa korte; ikaduhang kalapasan dunay multa nga dili moubos sa P5,000 ug 30 ka adlaw nga pagkabilanggo; ug sa ikatulong kalapasan nga multa labing minus P10,000 ug 30 ka adlaw nga pagkabilanggo.

Lakip sa multa ang pag-undang sa mga benepisyo ug mga allowance nga gihatag sa kagamhanan sa siyudad sulod sa duha ka tuig gikan sa pagpahamtang sa silot.

Ang mga patigayon mahimo sab nga tangtangan sa permit o kaha pagsirado sa negosyo. /GMR (BANATNEWS)