Gibuwagan sa uyab naghikog
CEBU, Philippines — Patay na nga nadiskubrehan sulod sa bakanteng payag sa Sitio San Antonio, Jubay, Lungsod sa Liloan ang usa ka 19-anyos nga gituohang naghikog pinaagi sa paghigot og pisi sa iyang liog.
Si Police Master Sergeant Jonas Catubig sa Liloan Police Station niila sa namatay nga si Darryl Kint Pepito, ulitawo nga nagpuyo sa maong dapit.
Matud ni Catubig nga ang mga silingan sa maong lugar maoy unang nakadiskubre sa nagbitay nga lawas sa batan-on hinungdan nga dali nilang gipahibawo ang mga sakop sa pamilya.
Dugang pa ni Catubig nga dali kining gitabang pinaagi sa pagtangtang sa gihigot nga pisi sa liog ug gidala sa tambalanan apan gideklarar nga dead on arrival.
Si Catubig niingon nga sa ilang nasayran gikan sa mga sakop sa pamilya sa namatay nga pipila na ka adlaw nga ilang namatikdan nga magsige kini og hinuktok nga mag-inusara.
Kini nahitabo sukad nga gibuwagan sa babaye nga nahimo niining hinigugma nga gikaguol sa maong batan-on nga maoy hinungdan sa paghikog niini. /GMR (BANATNEWS)
- Latest
