Cuenco Mitaliwan Na

CEBU, Philippines — Mitaliwan na ang usa sa mga beteranong Sugboanong magbabalaod nga si Cebu City Councilor Antonio Cuenco kagahapon sa hapon sud sa us aka pribadong tambalanan.

Si Cuenco giingong positibo sa novel coronavirus disease 2019 (COVID-19) matud pa sa iyang anak nga si kanhi konsehal James Anthony Cuenco.

"Yes, I can confirm that he is COVID positive but I would like to beg off from an interview as we are now dedicating all our resources to his medical concerns," matud sa batan-ong Cuenco sayo kagahapong adlawa sa dihang gikuhaan og pamahayag.

Si Cuenco nakaapil pa sa online session sa City Council kaniadtong Miyerkules, Hunyo 24, 2020 samtang kini naka confine na sa tambalanan.

Sa special session sa City Council kaniadtong Biyernes, Hunyo 26 gipahibalo sa konseho nga on leave ang 84-anyos nga konsehal.

Apan kagahapong adlawa sa hapon, subo nga gipahibalo sa iyang pamilya nga nitaliwan na ang konsehal.

“My family and I wish to let you know that my father, Councilor and former Congressman Antonio Veloso Cuenco, has succumbed to the lethal effects of the COVID19 virus. It happened so fast and has left us very shocked to realize that the good man that we have had the opportunity to have as our father (with my siblings Ronald, Antonio Jr. and Cynthia) and a good husband to my mother, Nancy, is gone,” tipik sa ilang pamahayag diha sa Facebook page ni James.

“We all know that our time in this world is limited, and that eventually all of us will end up underneath a covering, never to wake up. And yet it is always a shock when it happens to someone we know. Much more if it is someone we have known and loved for so many years,” dugang pa niini.

Mihangyo pamilyang Cuenco sa publiko nga hatagan una sila og panahon sa pagbangutan.

Si Cuenco usa sa mga beteranong Sugboanong magbabalaod nagsugod sa iyang karera sa politika sa edad nga 29 anyos dihang kini napiling Kongresista nidtong 1965 hangtud 1969 (6th Congress) sa Cebu City 5th District.

Nasundan pa kini sa 8th, 9th ug 10th Congresses (1987–1998) ug sa Batasang Pambansa (1984–1986); 12th , 13th congress ug kataposan siyang nahimong kongresista sa 2nd District niadtong 2007 nga natapos 2010.

Sa nakalabay nga piniliay niadtong 2019, si Cuenco nakadaog isip konsehal sa 2nd District sa Cebu City.

Sa wala pa siya nahimong konsehal, nahimong Secretary General sa ASEAN Inter-Parliamentary Assembly (AIPA) si Cuenco gikan 2010 hangtud 2013. /IBM (BANATNEWS)