Paglabay ug mga “hospital waste” sa Lapu-Lapu imbestigahon
CEBU, Philippines — Gimando ni Lapu-lapu City Mayor Junard Ahong Chan ang pagpahigayon og hiniusang imbestigasyon sa kapolisan ug city health office kalabot sa nadiskubrehan nga gipanglabay nga hospital waste sa bakanting luna sa Barangay Pajo sa Dakbayan sa Lapu-Lapu.
Suma pa ni Mayor Chan nga kinahanglan nga masuta kun si kinsa ang tag-iya ingon man ang naglabay sa maong mga hospital waste ilabi na karon nga pabiling naghulga ang coronavirus disease.
Si Pajo Barangay Captain Lyndell Bullos nga nahinabi sa mga tigbalita miingon nga usa ka guwardiya maoy unang nakadiskubre sa nagpasad nga mga basura nga natabunan sa mga sagbot.
Ang maong mga basura naglakip sa ginamit na nga mga needles ug ubang gikonsiderar nga infectious materials nga gikan sa ospital.
Gitataw ni Kapitan Bullos nga nagtinguha usab sila sa pagpahibalo sa buhatan sa Department of Environment and Natural Resources (DENR) 7 tungod kay dilikado ang maong matang sa basura ilabi na kay daghang mga bata nga magduwa sa maong dapit. /MEL (BANATNEWS)
- Latest
