“Road concreting project” sa lungsod sa Barili matapos sunod buwan

CEBU, Philippines — Moabot ngadto sa P35.9 milyones nga road concreting project sa Gunting-Balao road sa lungsod sa Barili ang gipaabot nga hingpit na nga matapos sunod bulan.

Sa report sa Sugbo news, ang news outlet sa Probinsya sa Sugbo, ang maong proyekto anaa na sa 70 porsyento nga kumpleto.

Si Cebu Governor Gwendolyn Garcia nibisita sa maong dapit aron pag susi sa dagan sa maong proyekto niadtong huwebes Hunyo 18, uban ang mga opisyal sa Kapitolyo ug lungsod sa Barili.

Si Kapitan Agriculo Cereneo nagkanayon nga pinaagi sa maong road development dali na ang pag access o pag- agi sa mga negosyante gikan sa barangay Gunting , Pangpang, Balao, Tubod, Mantayupan ug Luhod padulong sa mga pampubliko nga merkado sa Barangay Mantalongon aron pagbaligya sa ilang produkto.

Si Engr. Jerome Cala sa  First Grandeur Building nagkanayon nga niadtong Disyembre 2019 gisugdan ang maong proyekto ug gikatakda unta nga mahuman niadtong Abril ning tuiga apan tungod sa pandemya nga coronavirus disease nalangay ang pag trabaho sa maong proyekto.

 “Among mga tawo from other provinces wala katabok og tungod sab sa Covid-19,” matod ni Cala sa report sa Sugbo News.

Suma pa usab ni Provincial Engineer Hector Jamora nga kon mahuman ang  Phase 1, sugdan na dayon ang 1. 091 kilometro nga Phase 2 nga gibana bana nga moggasto ug P13 milyones pesos nga anaa karon sa bidding.

 “Since provincial road ni siya ang gilapdon is 5 meters, unya ang thickness kay 23 centimeters,” matod ni Jamora.

Ang lungsod sa Barili adunay umaabot nga tulo ka concreting project diha sa Dakit-Cagay nga  1.5 kilometro nga dalan, , Mantalongon Circumferential Road sulod sa public market nga 270 meters ang sukod, ug Mantayupan-Luhod road project nga 800 meters usab ang gitas-on. /MEL (BANATNEWS)