Ferro: Survey ang gihimo dili pagpamugos sa LGUs

CEBU, Philippines — Ang mga Local Government Unit (LGU) sa Probinsiya sa Sugbo giingong gipugos sa sa pagsuporta sa Anti-Terror Bill.

Si Police Brigadier General Albert Ferro, direktor sa Police Regional Office (PRO)-7 nihimakak niini ug matud niya nga walay direktiba gikan sa kadagkoan sa kapolisan nga pagpamugos ngadto sa mga LGU sa Probinsiya sa Sugbo sa pagpasuporta sa maong balaodnon.

Giingong ang Cebu Provincial Police Office (CPPO) nipadala og memo sa mga police station sa probinsiya aron mopahigayon og survey sa mga residente diha sa ilang mga lugar kabahin sa ilang baroganan sa nahisgutang balaodnon.

Giingong adunay nigawas nga impormasyon gikan sa usa ka estasyonan sa radyo kabahin sa maong isyu.

“That’s not true, and I guess we address that already in the proper station who wrong accused us because that is not true, we are take action on the particular (radio) station”, matud ni Ferro.

Sa iyang bahin, si Police Colonel Rhoderick Mariano, direktor sa CPPO nagkanayon nga iyaha na usab nga gipaimbestigar ang tinubdan sa sayop nga impormasyon nga gipakatap sa usa ka national radio station.

Dugang ni Mariano nga ang maong memo nga gipagawas dili kini pagpamugos sa LGUs apan direktiba kini sa provincial headquarter ngadto sa mga municipal ug city police station sa Probinsiya sa Sugbo alang sa survey. /BDB (BANATNEWS)