Mananagat nalumos sa kadagatan sa lungsod sa Barili
CEBU, Philippines — Patay ang usa ka 34 anyos nga mananagat human kini nalumos sa kadagatan sa Barangay Japitan, lungsod sa Barili sa probinsya sa Sugbo Lunes sa buntag. Ang nakalas naila nga si Eduvegis Bustamante, minyo ug residente sa maong lugar.
Ang inahan sa biktima nga si Magdalena Bustamante personal nga nidangop sa Barili Police Station human nalumos ang anak niini dili mominos sa 15 metros ang gilay-on sa Wharf sa Barangay Japitan.
Matud pa ni PMSg Mark Anthony Fat, Desk Officer sa Barili Police Station, base sa initial nga pakisusi sa pamahayag sa inahan sa biktima nagsakay kini sa sakayan uban sa laing mananagat nga modunggo unta sa wharf apan niambak si Bustamante sa dagat aron mopagawas sa hugaw.
Sumala pa ni Fat, nahibulong ang kauban niining mananagat nga wala na motunga ang biktima hinungdan nga kini gisawom apan mao nalang ang nakita niini nga wala nay panimuot si Bustamante hinungdan nga dali kini nilang gidala sa Barili District Hospital. Apan gidelarar nga patay na ang biktima pag abot sa tambalanan.
Segun sa pagsusi sa mga doctor nalumos gyud ang biktima ug way foul play ang kamatayon niini. /MEL (BANATNEWS)
- Latest
