Bagyong Butchoy mosulod sa nasud

CEBU, Philippines — Gipaabot ang ikaduhang bagyo karong tuiga nga moigo sa Northern Luzon karon ug ugmang adlawa.

Kini ang gitug-an ni Engr. Al Quiblat, pangulo sa Philippine Atmospheric, Geophysical and Astronomical Services Administration (PAGASA)-Mactan.

Matud pa ni Quiblat nga naa karon ang low pressure area sa 465 kilometros subangan sa Guiuan, Eastern Samar nga sulod sa inter-tropical convergence zone. Sumala pa ni Quiblat nga ang bagyo tawgon og Butchoy nga magdala og kasarangan nga dag-om sa kalangitan sa Sugbo.

Gitug-an ni Quiblat nga adunay katag nga ulan sugod karong adlawa hangtud sa Byiernes tungod sa ITCZ ug LPA ug posibleng kusog nga ulan inubanan sa dugdog ug kilat. Masinati usab ang pat-ak nga pag-ulan hangtud sa Sabado. /GMR (BANATNEWS)