Malapascua butangan og police outpost

CEBU, Philippines — Usa ka complimentary police outpost ang itukod sa Malapascua Island isip pangandam sa Cebu Police Provincial Office (CPPO) sa anam-anam nga pag-abli sa mga tourist destinations sa isla.

Ang ground breaking gipahigayon niadtong Biyernes ug gitawag nga Island Advance Northern Police Post.

Matud ni Police Colonel Roderick Mariano, ang director sa CPPO, nga ang maong police outpost usa ka complimentary sa Daanbantayan Police Station tungod kay ang PNP nangandam na usab alang sa pagbukas sa mga tourist attractions sa isla.

Ilawom kini sa operations sa Daanbantayan Police Station ug mga tourist police.

Usa ka team nga gilangkuban sa pito ka police personnel ang modumala sa outpost.

Apil sa ilang mga gimbuhaton mao ang police response ug hangtud sa pag-file ug blotter report. Ang imbestigasyon magpabilin gihapon sa Daanbantayan Police Station.

Matud ni Mariano nga ang pag-install sa police outpost sa Malapascua usa ka pag-boost sa imahe sa isla diin makita ang presensya sa kapolisan.

“Maganda ay nagkaroon ng collaboration and ating local government doon at yung grupo ng mga beach resort na mga businesses doon, ito yung gusto nila na magkaroon ng maayo-ayo na police station doon sa island,” sigun ni Mariano.

Ang proyekto gisugdan sa PNP uban sa koordinasyon sa LGU ug mga tag-iya sa beach resorts aron ibalik ang “glory” sa isla human malibkas ang enhanced community quarantine (ECQ) sa Lalawigan sa Sugbo.

Ang police outpost nahimutang duol sa mga lugar nga gipuy-an ug malakaw lang gikan sa baybayon sa Isla sa Malapascua nga mo-operate na human sa tulo ka buwan. /GMR (BANATNEWS)