Durano nibali, nihurar kang Frasco

CEBU, Philippines — Usa ka sakop sa pamilyang Durano nga barangay kapitan sa Dakbayan sa Danao ang nitapon ug nihurar sa kampo ni Kongresista Vincent Franco “Duke” Frasco sa ikalimang distrito sa Lalawigan sa Sugbo.

Niadtong Mayo 23 nihurar kang Frasco si Kapitan Telesforo Durano sa Barangay Dungga, bukirang bahin sa Dakbayan sa Danao.

Kauban ni Durano sa paghurar sila si Barangay Konsehal Juanita Lawas, Konsehal Daniel Alerta, ug Sangguniang Kabataan Chairman Remond Lavador.

Nisaksi niini sila si Liloan Mayor Christina Frasco, asawa ni Kongresista Frasco; Bokal Andrei “Red” Duterte, ug Mike Villamor, igsuon ni Carmen Mayor Carlo Villamor nga niuban sa kongresista sa maong adlaw alang sa pag-apod-apod og mga relief goods, mask, ug tests kits sa laing-laing bahin sa distrito.

Si Durano ug iyang mga kaubang opisyal kanhi mga sakop sa Barug Alang sa Kalambuan ug Demokrasya (Bakud) Party sa mga Durano sa distrito.

Sa niaging eleksiyon sa 2019, napilde ni Frasco si kanhi kongresista Ramon “Red” Durano VI isip kongresista sa ikalimang distrito ug maoy nagtapos sa pito ka dekada nga paghupot sa mga Durano sa distrito sukad pa sa tuig 1949.

Sa iyang mensahe, si Frasco nipadayag sa iyang kalipay sa paghangop kaniya sa katawhan sa Dakbayan sa Danao.

Sukad si Frasco nahimong kongresista sa distrito nakahatag na kini og sobra sa 2,000 ka scholarships, ug nakapa-abli ug pagpasemento sa mga dalan sa lain-laing  lungsod. Mokabat usab sa P20 milyones ang pundo ang gigahin alang sa iyang medical assistance nga makatabang sa mga na-admit sa mga ospital.  (BANATNEWS)