Volunteer diha sa Mambaling gikulata patay

CEBU, Philippines — Patay ang usa ka volunteer human giingong gikulata sa mga wala mailhing mga tawo diha sa Sitio Lawis sa Barangay Mambaling Dakbayan sa Sugbo.

Naila lang ang biktima nga alyas “Agu” ,34, nga temporaryong nagpuyo sa maong lugar ug nagboluntaryo sa pagbantay sa mga entrada ug gawsanan sa Mambaling nga gipaubos sa total lockdown tungod sa padayon nga pagsaka sa kaso nga natapnan sa novel coronavirus (COVID19).

Matud ni Mambaling Police Station Chief Police Captain Francis Renz Talosig samtang nagbantay sa entrada sa Sitio Lawis ang biktima gikalitan lang kini og duol ug gikulata.

Sayo niana, giingong adunay babayeng gituok ug gilabay sa biktima og bangko sa wala pa masayring rason. Gisusi karon kun may koneksyon ang nahitabo sa pagpatay sa biktima. /IBM (BANATNEWS)