May biyahe na sa Isla sa Olango

CEBU, Philippines — Gikalipay sa mga molupyo sa Isla sa Olango ang pagbalik na sa mga biyahe sa mga motor banca paingon sa mga pantalan sa Dakbayan sa Lapu-Lapu.

Hinuon higpit gihapon nga gibantayan sa mga sakop sa Philippine Coast Guard ug kapolisan tungod kay hugot man usab nga gipatuman ang new normal protocol sa paglikay sa pagtakboy sa coronavirus disease 2019.

Naglakip sa mga motor banca nga nibalik na sa ilang pagbiyahe mao ang gikan sa Hilton Wharf sa Barangay Punta Engaño, Angasil sa Barangay Mactan ug Barangay Marigondon.

Higpit nga gipatuman ang pagpadala sa quarantine pass, pagsul-ob og face mask, paglimpyo sa kamot pinaagi sa pagpanghunaw sa dayon sakay, social distancing ug ingon man katunga lang ang gitugot nga gidaghanon nga mosakay nga pasahero.

Ang kadaghanan sa mga pasahero nga nisakay sa maong mga biyahe sa motor banca gikan sa Isla sa Olango maoy mahinungdanon nilang tuyo ang pagpamalit sa ilang nag-unang panginahanglan sama sa pagkaon. /GMR (BANATNEWS)