Plitehan sa bus giusbawan
CEBU, Philippines — Giusbawan nga plitehan sa mga bus nga pasaheroan maoy mosugat sa mga pasahero sa pagbalik og biyahe niini.
Gipahibawo ni Land Transportation Franchising and Regulatory Board 7 Director Eduardo Montealto nga ang pag-usbaw tungod usab sa pagpatuman sa social distancing.
Matud niya nga ang katunga lang sa kapasidad sa mga pasahero ang tugotan nga makasakay hinungdan nga giusbawan usab ang plitehan.
Ang minimum nga plitehan sa non-aircon nga bus nga tag P9.00 kaniadto mahimo na kining P11.00 ug dugang P1.75 sa matag kilometro nga pagbiyahe niini.
Samtang sa mga aircondition nga mga bus nga pasaheroan nga P11.00 kaniadto ang plite mahimo na kining P13.00 ug dugang P2.50 sa matag kilometro nga pagbiyahe.
Nunot usab niini ang Dakbayan sa Mandaue nga nagpabilin pa ubos sa enhanced community quarantine, ang mga sakyanan gikan sa amihanang bahin sa Lalawigan sa Sugbo ang anha lang kutob sa utlanan nga bahin sa Lungsod sa Consolacion. /GMR (BANATNEWS)
- Latest
