Taga Malapascua makatabok na sa Maya

CEBU, Philippines — Nipagawas og kamanduan si Daanbantayan Mayor Sun Shimura kalabot sa mga residente sa Isla sa Malapascua o Barangay Logon nga motabok sa Maya New Port.

Sa Executive Order No. 27, si Shimura nimando nga ang mga rehistrado nga passenger boats ang tugotan nga mobiyahe matag adlaw nga Miyerkules ug Sabado lang.

Kinahanglang katunga sa P100 nga plitehan ang ipasingil sa mga pasahero ug kinahanglan usab nga katunga ra sa kapasidad sa bangka ang makasakay. Ang tanang pasahero apil na ang tripolante kinahanglan magsul-ob og face masks ug mo-obserbar sa physical distancing.

Ang mga opisyal sa Barangay Logon kinahanglan usab nga mohatag og libre nga sakay gikan ug pabalik sa isla.

"Residents who can avail of the free rides are those that belong to the poorest of the poor as identified by the barangay officials," matud sa EO ni Shimura.

Ang schedule sa byahe sa mga libre nga pasahero gitakda alas 8 ug alas 10 sa buntag gikan sa Barangay Logon ug alas 2 ug alas 4 sa hapon gikan sa Maya New Port matag Lunes ug Biyernes.

Kinahanglan usab nga ang tugotan nga makasakay nga pasahero katunga lang sa kapasidad sa bangka.

"Registered passenger boats that are utilized for free rides on Mondays and Fridays can also transport passengers on Wednesdays and Saturdays with corresponding fares," sumala sa EO sa mayor nga giluwatan niadtong Mayo 7, 2020.

Walay tugotan nga pribado nga bangka o fishing boat nga mokarga og pasahero gawas lang kung adunay emerhensiya.

Ang lokal nga kagamhanan sa lungsod mohatag og libre nga sakay alang sa mga tawo nga gikan sa Maya New Port ngadto sa Barangay Poblacion ug pabalik alang sa pagpalit sa batakang panginahanglan. /GMR (BANATNEWS)