Kapitolyo nihatag og breakdown sa hinabang

CEBU, Philippines — Ang Kapitolyo nihatag og breakdown sa hinabang pinansiyal nga nahatag na sa Probinsya sa Sugbo ngadto sa 44 ka lungsod ug unom ka siyudad sa lalawigan tungod sa nasinati karon nga covid-19 pandemic.  Base sa report sa Sugbo News, facebook page sa Probinsiya sa Sugbo nga ang ayuda sa Kapitolyo nagdepende sa income sa Local Government Unit (LGU) ug populasyon niini.

“Ang kantidad nga gihatag nga hinabang magdepende sa income class sa munisipyo o dakbayan, mas dako ang kantidad nga gigahin per person kong gamay ang income sa LGU”, tipik sa facebook post sa Sugbo News.

Sa mga siyudad nga ubos sa Lalawigan sa Sugbo, P50 per capita o matag tawo sa mga 1st ngadto sa 3rd income class nga siyudad samtang P100 per capita samba sa 4th ngadto sa 6th income class nga dakbayan.

Sa mga lungsod, P100 per capita ang ihatag ngadto sa mga 1st class nga munisipyo; P150 matag tawo usab sa 2nd ug 3rd class nga lungsod ug P200 per capita alang sa mga 4th ug 5th class.

Ang Dakbayan sa Talisay nga usa ka third class nga dakbayan nga adunay P706 milyones nga income ug anaa sa 227, 600 ang round off population nakadawat kini og P11.3 milyones gikan sa Kapitolyo.

Ang Lungsod sa Liloan nga usa ka first class municipality nga adunay income nga P264 milyones ug populasyon nga 118, 700 nakadawat kini og P11.8 milyones gikan sa Probinsiya.

Samtang ang Poro sa Isla sa Camotes nga usa ka 4th class municipality aduna kini P95 milyones nga income ug 25, 200 nga populasyon nakadawat kini og P5 milyones nga ayuda gikan sa Probinsiya sa Sugbo. /BDB (BANATNEWS)