Wa mahibulong nga gamay ra ang nagpa-test
CEBU, Philippines — Wa mahibulong ang mga opisyales sa Dakbayan sa Sugbo kun nganong gamay lang kaayo ang mga nikooperar sa pagpaubos sa strategic community testing nga gisugdan niadtong Mayo 6 isip kabahin sa Project Balik Buhay kay boluntaryo lang kini.
Tulo ka barangay ang gipahigayonan maong test nga mao ang Barangay Inayawan, Basak San Nicolas ug Basak Pardo. Apan ang resulta naa lang sa 195 ka mga tawo tanan ang nipaubos sa maong test.
Si Konsehal Raymond Alvin Garcia, co-chair sa Public Sector sa Project-Balik Buhay miasoy nga expected gyud nga ubos ang turnout sa unang adlaw sa strategic community testing.
Matud ni Garcia nga ang rason nganong ubos ang resulta possible wala kahibawo ang mga tawo sa proseso o paghimo sa test nga sama ra nga magpakuha og dugo.
“I’m pretty confident nga we can reach our target however ang katong 10 days basin ma extend nato gamay just to be able to accommodate the number of days nga maigo gyud nato ang 10 percent. Ang atoang target is 150 test per team and we have deployed about 14 to 18 teams so mao na atong gitan-aw in 10 days mahuman na gyud tong more or less 20 to 25,000 nga households nga atong makuha,” asoy ni Garcia.
Giklaro niya nga dili kini pugsanay apan giawhag niya ang katawhan nga dili mahadlok niini.
Samtang kagahapong adlawa na mga Barangay nga dunay strategic community testing mao ang Bulacao, Hipodromo, Mambaling ug Tisa.
Nabantayan nga ubay-ubay nga mga Tisaanon ang nagpakuha og test sama sa 26 anyos nga residente sa maong lugar diin tumong niya sa pagpaubos sa rapid testing aron duna siya’y kalinaw.
Si Police Senior Master Sergeant Norman Vincent Palomo nga nadestino sa Regional Plans and Strategic Management Division sa Police Regional Office-7 mipaubos sab sa rapid testing.
Si Palomo na-deploy karon siya sa Waterfront Police Station ug naa iyang pangalan sa lista sa Barangay Tisa nga mopatubos sa maong test. Matud niya maayo kini para niya nga frontliner.
Sa Tisa II Elementary School ang designated extraction site sa Barangay Tisa. /IBM (BANATNEWS)
- Latest
