Hinabang sa senior citizen gikatakda nang ihatag

CEBU, Philippines — Ang pagpanghatag og hinabang sa senior citizen gikatakdang sugdan na sa sunod semana kong kini walay mga kakulian ug mahuman na ang tanang proseso nga gikinahanglan.

Si Atty. Jerone Castillo, Special Assistant for Finance and Treasury kinsa gitahasan sa pag-atiman sa financial sa mga senior citizen nagkanayon nga ubos sa kamandoan ni Mayor Edgardo Labella ipahatag sa labing dali nga panahon ang financial assistance sa senior citizens sa buwan sa Marso, Abril ug Mayo.

Si Castillo gisangonan usab kini sa pag-establisar og protocols alang sa kaluwasan sa panglawas atol sa distribution sa hinabang pinansiyal.

Pinaagi sa tabang sa Commission on Audit (COA) na-finalize na nila ang protocols diin dili istrikto ang liquidation procedures, non-contact ang distribution pasabot niini wala nay pirmahan ang mga senior citizen ug kon itugot sa sitwasyon house to house ang paghimo niini.

Ug kon maglisod gyud sa house to house posible mo-identify sila og mga lugar diin ang social distancing requirement ug infection control protocol masunod.

Makig-alayon gihapon sila sa barangay aron mo-assist kanila sa pagdeterminar sa dapit nga nagpuyo ang mga makadawat sa financial assistance.

Wala nay pirmahan ang senior citizen apan kuhaan kini og picture alang sa documentation.

Gibana-bana nila nga molanat og lima ngadto sa napulo ka adlaw ang pagpang-apod-apod sa financial assistance.

Si Castillo nagkanayon nga hatagan gihapon og kahigayonan nga makakuha sa ilang hinabang ang mga senior citizen nga atoa sa laing lugar ug wala pa makauli sa Cebu City tungod kay naabtan sa implementasyon sa enhanced community quarantine kong malibkas na ang ECQ ug makabalik sila sa Cebu City.

Gibana-bana nga kapin sa 82,000 ka senior citizens ang makadawat sa hinabang pinansiyal gikan sa Cebu City government. /BDB (BANATNEWS)